SRI AMAN, 27 Ogos: Pemujur Pemain Boxing Sarawak Daelonial Mcdelon tauka Kilat Boy ngalahka Pemain Boxing ari Indonesia Oky Akbar ba Pekit Boxing Tebuka Sarawak Kategori Super Featherweight chukup besai reti laban nya deka dikena iya nyikap diri sebedau bepekit ba Dubai.
Ku Kilat Boy, taja bisi deka pepedis mimit ba pun main tang iya tetap ulih meri fokus nyentuk ngapuska pekit sampai raun keenam.
“Pekit tadi (kemari) ba raun ti kedua aku bisi nguji ngatur bukut Knock down ngagai Oky Akbar tang aku enda kempang.
“Taja pia aku mujur ngentapka fokus aku ba raun ketiga nyentuk ke raun ke penudi iya nya raun keenam lalu maya belaban tadi aku nerima satup ti balat laban iya (Oky) berengkah ulih macha chara aku bemain ba raun kelima enggau raun keenam,” ku iya maya dirandau TVS pengudah abis pekit nya, malam tadi.
Udah nya, Kilat Boy madah pemujur nya mega beguna bendar dikena iya bepekit di Dubai bulan Oktober tu ila.
“Perambu ba pekit ti deka datai enti nyadi laban tu (pemujur) nyadi siti ‘ranking’ dikena aku bepekit ke Dubai ba bulan Oktober tu nyema bisi belanja sereta timbal ke manah,” ku iya.
Kilat Boy ke mega peranak asal Sri Aman ngalahka Oky Akbar enggau penyampau poin 180 bebalas 159.
Ba sebengkah agi pekit ba Kategori Serakup Besai Boxing Asia (ABF) Pemain Boxing ari Jipun, Toshihiko Era mega mujur ngalahka siku agi Pemain Boxing ari Indonesia, Frenky Rohi nengah teknical knockout (TKO) ba raun keterubah.
Ungkup rikod, tu keterubah iya pekit boxing profesional diatur ba Stadium Betutup Simanggang, ditu.-TVS
