SRI AMAN, 27 Ogos: Rintai nama 16 iku atlit boxing ti deka ngarika nengeri Sarawak ungkup Lumba Malaysia (SUKMA) 2024 nadai berubah.
Presiden Gerempung Boxing Nengeri Sarawak (SABA), Dato Rahman Lariwoo madah, semua rintai nama atlit ke udah dipilih ngarika Sarawak ungkup SUKMA nya agi mengkang baka selama.
“Rintai nama sida (atlit) Boxing ti deka ngarika Sarawak ba pekit serak tu (Boxing Tebuka Sarawak) deka mengkang dipilih ngarika Sarawak ba Pekit Boxing Lumba Malaysia (SUKMA) 2024 ila,” ku iya.
Rahman mansutka penerang nya maya dirandau pemberita pengudah tembu Pekit Boxing Tebuka Sarawak diatur ba Stadium Betutup Simanggang malam tadi.
Nangkan ke nya, Rahman madah diri chukup gaga laban pemain boxing Sarawak teulihka tujuh iti midul emas ba pekit boxing nya.
Ku, pemujur ke dijalai nya ngelui ari penyampau ke ditagaka Menteri Nembiak, Lumba enggau Main Sarawak, Datuk Seri Abdul Karim Rahman Hamzah sebedau tu ti semina nyaran bulih enam iti midul emas.
“Ba pekit tu Sarawak mujur teulihka tujuh iti midul emas.
“Enti nitihka saran diberi Menteri kitai nya siti tanggung pengawa ke chukup berat laban iya (Menteri) dekaka enam iti midul emas sebedau tu tang nengah kerejasama Gerempung Boxing Nengeri Sarawak enggau Sarawak Sport Corporation (SSC) kitai mujur nyapai pemujur nya,” ku tandu iya.
Ngelansa pekara bekaul, Stadium Betutup Simanggang di Sri Aman sebedau tu udah dipilih nyadi siti palan ngatur pekit boxing ungkup SUKMA taun baru.-TVS
