SRI AMAN, 26 Ogos: Pemain boxing Jipun, Toshihiko Era enggau Indonesia, Frenky Rohi malam tu deka berebutka gelar champion Pekit Besai Boxing Asia (ABF).
Ba aum pemberita ke diatur lemai kemari, Toshihiko andal diri ulih menang berindik ari pemanah sukung ti dipandangka peranak menua Sri Aman ti chukup rinduka main boxing.
“Nengah sukung penuh mensia mayuh ditu asai iya aku ulih belaban enggau lebih regas,” ku iya.
Udah nya, maya meri timbal senentang Frenky Rohi iya madah, Frenky siku peninju ke chukup kering sereta udah suah menang empat kali lalu ngembuan empat iti sementing sebedau tu.
“Iya (Frenky) siku pemain boxing ti chukup kering lalu siku ari pemain boxing ke landik nguna teknikal ke mega udah bisi empat iti sementing.
“Nya alai ba pekit ke diatur pagila (malam tu) deka nyadi siti pekit ke penuh enggau teknikal lalu aku mesti bebendar nguji ngalahka iya (Frenky),” ku tandu Toshihiko.
Ungkup penerang, malam tu legi Toshihiko enggau Frenky Rohi ari Yogyakarta, Indonesia deka ngerebut gelar champion Pekit Besai Boxing Asia (ABF) ba pekit dikumbai Kingdom of Fighters berengkah pukul 8 malam ba Stadium Betutup Kompleks Lumba Sri Aman.
Nya alai, mensia mayuh ke besemak di Sri Aman anang ngelepaska peluang sampal datai ngemataka Pekit Boxing Kingdom of Fighters tu.-TVS
