JULAU, 26 Ogos: Siku lelaki ditan polis pengudah dipelaba nimbak sebuah kerita pikap 4WD ba sebengkah insiden ke bepun ari dendam.
Insiden nya udah diripotka siku orang ti madahka kerita Toyota Hilux diempu anak iya kena timbak ba sepiak penuduk deriba maya ba rantau jalai nuju ke rumah di Sungai Pinang, Jalai Wak Buku di Pakan, Julau kena pukul 10.45 malam Hari Tiga tu tadi.
Tuai Polis Pelilih Julau, Deputi Superintendan (DSP) Andam Sulin madah, saspek lelaki beumur urung 20 taun mujur ditan ba Pasar Pakan kena pukul 5.30 lemai hari empat.
“Bekau ari penerang ke udah diberi seraban polis ari Opis Pansik Jenayah (D9) Indu Opis Polis Kontinjen Sarawak begulai enggau raban ari Unit Pansik Penyalah Indu Opis Polis Pelilih Julau udah mujur nangkap saspek iya nya siku lelaki bansa Iban beumur urung 20 taun.
“Raban kami mega udah ngerampas dua iti senapang patah bansa Bakakuk enggau dua iti senapang angin gaga diri empu,” ku iya nengah sebengkah sehari tu tadi.
Ku iya, asil barang ke dirampas sereta saspek udah dibai ngagai IPD Julau ngambika dipejalai atur ke patut.
Kes dipansik nitihka Seksyen 307 Kanun Keseksaan ti ngundan ukum jil enda ngelui 10 taun.
“Kami perchaya tuju suspek baka nya laban dendam saspek ngagai ruang bilik tudah ke ditimbak bekau ari pengeran ati iya enda diterima siku orang ke sebilik enggau sida ti ngaga ripot.
Nya alai, DSP Andam ngelalau mensia mayuh anang nyimpan senapang ke digaga diri empu laban pengawa nya salah ari sukut undang-undang nitihka Akta Senjata Api 1960 enggau ulih kena tinggang ukum nitihka Seksyen 8A Akta ke sama.
Nyema dikenuku salah ulih ditinggang ukum jil enda ngelui tujuh taun tauka ukum mata duit enda ngelui RM10,000 tauka kededua ukum nya sekali.-TVS
