KUCHING, 25 Ogos: Jaguh angkat berat paralimpik menua, Bonnie Bunyau Gustin sekali agi ngemegahka nama menua pengudah mujur mechahka rikod dunya ba achara 72 kilogram (kg) ti ngujungka iya bulih midul emas ba Pekit Angkat Berat Para Dunia 2023 di Emiriah Arab Bersatu (UAE) kemari.
Atlit asal ari Sarawak nya mujur ngangkatka pemerat 231 kg sereta madamka rikod lama dikembuan iya empu pemerat 230 kg ba taun 2021 suba.
Pemujur nya ngemataka Bonnie Bunyau ke mega champion Lumba Paralimpik Tokyo 2020 ulih masuk pekit ke sama ba Paris taun baru.
Ba pekit nya, Bonnie Bunyau ngalahka pengari Itali, Donato Telesca ke semina teangkatka pemerat 202 kg sereta bulih midul pirak ditangkan Bekzod Jamilov ari Uzbekistan ke mai pulai midul engkeraju.
Sebedau tu, Bonnie Bunyau kala bulih gelar champion dunya ba taun 2019 enggau 2021.
Taun nyin kemari, iya mega nyulut teulihka midul emas ungkup tim Malaysia ba Lumba Komanwel Birmingham 2022. -TVS
