ROBAN, 24 Ogos: Perais mata duit sepenyampau RM26, 000 udah disediaka ungkup bala pemenang pekit lumba perau nyerumba Pesta Roban 2023.
Kaban Kunsil Negeri (ADUN) Kalaka Mohd Duri madah pengudah dipegulai semua penyampau semua perais tu manggai RM26,000 ungkup perais renggat bepilih enggau kepenudi pekit lumba perau.
Nya alai, iya ngarapka Pesta Roban serak tu ulih nerima sambut ti manah ari mensia mayuh lebih agi raban peminat pekit lumba perau di menua tu.
“Aku ngarapka mensia mayuh ulih sampal datai sereta nganjung tim lumba perau enggau tim bebatak tali atas ai.
“Penerang silik pasal pekit tu deka dipadah ngagai mensia mayuh pengudah tembu aum kepenudi kena 7 September tu,” ku iya maya dirandau media pasal Pesta Roban ba Bilik Aum Opis Pelilih Mit Roban tadi.
Sama bisi datai, Pegawai Opis Pelilih Mit (SAO) Roban, Steve Miller Nuas, tuai-tuai opis perintah ke bekaul sereta enggau tuai-tuai raban bansa.-TVS
