BETONG, 23 Ogos: Raban pedagang lebih agi raban pengemeran Dagang Jelan Pemesai (PKS) di menua tu diperansang mesti nguji bedagang nguna teknologi baru.
Penyanding Penemu Dagang Jelan Pemesai (PKS) Opis Dagang Antarabansa, Industri enggau Pemeranak Puku Sarawak (MINTRED), Datuk Mohd Naroden Majais madah, nengah cara tauka teknologi baru dagang sida deka lebih mujur enti dibandingka ngena chara lama.
“Anang nangi bedagang nguna cara baru.
“Suba engka kitai nguna chara lama baka aku agi mit kelia endang pengawa aku bedaja buah Semangka enggau Pau ngena talam engkah atas pala bejalai ngagai rumah siti ke rumah siti.
“Udah nya orang ngelakuka dagang ngena surat kabar, nyadung keretas ari rumah ke rumah enggau ke bukai tang diatu kitai ulih ngelakuka dagang kitai nengah internet lalu teknologi nya semina ba ujung jari kita,” ku iya.
Naroden madah munyi nya maya bejadika Program Jum Regista Bisnes diatur MINTRED begulai enggau Kaunsil Pemansang Ekonomi Sarawak (SEDC) ba ringkat baruh Kompleks Perintah Nengeri ditu, kemari.
Nambahka nya, ku Naroden pekara ti pemadu beguna raban orang dagang mesti nemu nguna manah teknologi ke bisi ba telefon pintar ngambika tau meri pemaik ngagai diri empu.
“Pekara ke pemadu beguna iya nya kitai mesti nemu nguna teknologi (aplikasyen) ke bisi dalam telefon kitai nya enggau manah.
“Nya ulih dikena mantu ngelakuka dagang kita empu.
“Guna nya dikena ngiga penerang enggau chara nyereta kus dikena ngulihka Setipikit Halal sereta chara ngelakuka dagang enggau ngerembaika makit enti sema bisi orang deka meli nengah chara dalam tali arus,” ku tandu iya.
Ungkup penerang, Program Jum Regista Bisnes nya mujur matak penatai urung 200 iku pedagang PKS di menua Betong.
Sama bisi datai Sapit Residen Betong, Mahra Salleh, Pegawai Pelilih Betong, Alfred Geling Ason, Pegawai Nguasa Opis SEDC Wilayah Betong, Mohd Aizat Dollah enggau bukai.-TVS
