BETONG, 21 Ogos : Bisi 220 iku penyereta udah nganjung nama ngambi bagi ba Lumba Ensikal Layar (LCC) 2023.
Kaban Kunsil Nengeri Layar (ADUN), Dato Gerald Rentap Jabu madah, taja pia pengawa nerima nama penyereta ke deka masuk pekit tu agi dibuka.
“Naka kemari (18 Ogos) kitai udah bisi nerima lebih kurang 220 iku penyereta ngenuku diri datai taja pia pengawa ngerejista nama tu agi dibuka.
“Selalu iya, ba pengawa belumba ensikal baka tu tim ke bebesai nyau rejister diri dudi,” ku iya.
Rentap ke mega Sapit Menteri Nembiak, Lumba enggau Main Sereta Pedagang Sarawak madah munyi nya pengudah nutup Program ‘Hydrogen And Tech Safari’ 3.0 ba Diwan Opis Residen Bagi Betong ditu, ensana.
Ungkup penerang, Pengerami Lumba Ensikal Layar tu deka diatur berengkah ari 1 nyentuk 3 September tu.
Ku iya, entara tim ari menua luar ke udah nganjung nama iya nya ari Filipina, Kalimantan Barat (KALBAR) Indonesia enggau Brunei.
“Bisi 12 iku tim Junior ari menua Filipina dua tim ari Kalimantan naka kediatu lalu ari Brunei pan bisi.
“Nyadi aku arapka nyema pesereta ari menua bukai nadai ila tang siku dua nya pan udah manah dikena kitai mandangka Lumba Ensikal Layar tu nyadi siti achara ninting taun ke ekstrem,” ku terang Rentap.-TVS
