BETONG, 21 Ogos: Program Hydrogen and Tech Safari 3.0 di Betong chukup nemban diatur nyadi pelasar dikena meri penerang pekara bekaul enggau teknologi gadung ngagai mensia mayuh.
Sapit Menteri Nembiak, Lumba enggau Main Sereta Orang Dagang Sarawak, Dato Gerald Rentap Jabu madahka program nya mega endur mensia mayuh ngulihka penerang ti bekaul enggau kus ke bisi disediaka ba Palan Penyulut Teknikal Sarawak (CENTEXS).
“Tu siti inisiatif dikena kitai nentuka komuniti bela diberi senentang bekal enggau tunga kuing perintah ari sukut teknologi gadung enggau hidrogen.
“Kelimpah ari nya kitai mega ngena peluang tu bekunsika sekeda kus ti bisi disediaka ba CENTEXS enggau ejensi ke bekaul.
“Ari program tu mega bisi diterangka senenang program ngaga kek, nusuk marik enggau beguntin dibaruh Program Ngaul Komuniti (COP) ke mayuh udah dipejalaika ba rumah-rumah panjai enggau genturung pendiau,” ku iya.
Rentap ke mega Kaban Kunsil Nengeri (ADUN) Layar madah munyi nya ngagai TVS pengudah tembu Nutup Program ‘Hydrogen And Tech Safari’ 3.0 ba Diwan Opis Residen Bagi Betong, ensana.
Nangkan ke nya, Rentap meransang mensia mayuh lebih agi raban nembiak di Betong anang enda nguna peluang ti disediaka enggau manah.
“Terima kasih ngagai Centexs ngagai Yayasan Sarawak, Opis MYED, Opis Residen enggau ke bukai laban udah ngatur program baka tu enggau mujur,” ku iya.
Program ‘Hydrogen and Tech Safari’ 3.0 di Betong iya nya program ti ketiga kali udah diatur nangkan di Lundu enggau Mukah.
Sama bisi datai Tuai Kampus Centexs Lundu ke mega Pegawai Penyambung CENTEXS Dr Nor Ashikin Abdul Rahman, Sapit Residen Betong, Mahra Salleh Ngarika Residen Betong Richard Michael Abu Nawas enggau ke bukai.-TVS
