SPAOH, 20 Ogos: Projek PROSPEK dipejalaika dibaruh Opis Pemansang Menua Pesisir enggau Wilayah (KKDW) beungkus RM9 juta ungkup menua Betong udah dikemendarka perintah besai.
Sapit Premier Sarawak, Datuk Amar Douglas Uggah Embas madahka, projek PROSPEK nya dipinta iya rambau penemuai seraya gawa Sapit Menteri Besai Datuk Seri Ahmad Zahid Hamidi ke Rumah Panjai Samu ditu, apin lama.
“Nyadi lebuh YAB Sapit Menteri Besai Datuk Seri Ahmad Zahid datai ke Samu aku bisi minta projek dikumbai Projek PROSPEK ari KKDW.
“Diatu peminta nya udah dikemendarka, nyadi Projek PROSPEK tu di Sarawak udah dipejalailka baka di Pelilih Matu (keterubah), kedua di Lawas enggau ketiga ditu (Betong),” ku iya.
Uggah ke mega Kaban Kunsil Nengeri (ADUN) Bukit Saban madah munyi nya ngagai raban media pengudah tembu Program Tuai Begulai enggau Rayat ba Rumah Mendit Unsu, Penom, Ulu Paku ditu, pagi tadi.
Nangkan ke nya, ku Uggah penembu projek PROSPEK nya ila mega deka nyungkak penatai pemisi peranak menua pesisir lebih agi di Bukit Saban seriris enggau projek pemansang ke dilanggur nengah BDDA.
“Nyadi tu projek program pemansang penuh ngaul infrastruktur enggau pengawa ekonomi ba sitak tu.
“PROSPEK mega ulih nambahka belanja projek pemansang dikena ngemansangka BDDA.
“Nya alai, PROSPEK tu diperati ukai semina endur ngiga belanja nambah tang strategi penemu manah dikena ngemansangka ekonomi menua pesisir.
“Taja pia pekara disaran jam ke diatu iya nya ngiga jalai dikena nyungkak penatai pemisi rayat,” ku iya.
Sama bisi datai Kaban Parlimen Betong Dr Richard Rapu, Sekretari Politik ba Opis Premier Roslind Mapong Sabai, Kunsil Pelilih Mit (SAO) Spaoh Lister Clement Guwie, Tuai Ukas Bagi Betong Tony Malang, Tuai Raban Bansa enggau ke bukai.-TVS
