SPAOH, 20 Ogos: Projek ngaga replika Kuta Bukit Sadok ke beungkus RM16 juta ditu deka berengkah enda lama agi sereta ditaga tembu dalam dua taun.
Sapit Premier Sarawak Datuk Amar Douglas Uggah Embas madahka agih belanja kena ngaga projek nya udah dikemendarka Premier Sarawak Datuk Patinggi Tan Sri Abang Johari Tun Openg sereta penembu iya jemah dikeandal ulih dikena matak temuai raun ke Betong.
“Siti projek ke besai deka digaga ba sitak Bukit Saban iya nya Projek Bukit Sadok.
“Premier Sarawak udah ngemendarka belanja RM16 juta diena ngemansangka Bukit Sadok.
“Nyadi utai tu deka berengkah dalam taun tu lalu ngarapka tembu dalam abis lama dua taun laban tu siti projek ke tau narit temuai raun ngagai menua Betong dudi hari,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya pengudah tembu Program Tuai Begulai enggau Rayat ba Rumah Mendit Unsu di Penom Ulu Paku Spaoh pagi tadi.
Kelimpah ari nya, ku Uggah agih projek nya nyengkau dikena ngemanah agi jalai ari Simpang Jambu nuju Bukit Sadok lalu penembu projek tu jemah deka nyadi siti ari produk dagang temuai baru di Betong.
“Pekara silik pasal projek tu iya kesatu iya nya ngaga jalai ari Simpang Jambu ngagai Bukit Sadok.
“Kedua ke besai iya deka ngaga replika kuta Rentap.
“Nya alai, nya utai ti deka digaga Replika Kuta Rentap laban nya deka nyadi siti produk dagang temuai ditu.
“Tambah mega laban menua tu enda lama agi deka bisi padang kapal mit reti nya mayuh orang ulih datai ngagai menua Spaoh sereta raun ke Bukit Sadok.-TVS
