SIBU, 20 Ogos: Parti Progresif Demokratik (PDP) enggau Parti Sarawak Bersatu (PSB) dijangka deka ‘sebilik’ ujung (Disember) taun tu.
Presiden PDP, Datuk Seri Tiong King Sing madahka, kededua parti nya patut bekerejasama lalu ngiga chara ke pemadu manah ungkup gempung nya ila.
“Kitai sehari tu ulih duduk begulai, aku meri terima kasih ngagai YAB Premier Sarawak laban udah ti meri peluang enggau sukung ngagai kitai (begempung).
“Nyadi kededua parti ulih duduk begulai dalam siti pelantar endur semua ulih bekerejasama.
“Malam tu aku bisi siti peminta ari kededua raban kitai mesti ngiga sama jalai nyingkang ke mua.
“Kitai numbuhka dua parti bekerejasama, baka ni kitai ulih bekereja begulai,” ku iya madah nyemetak.
Tiong ke mega Menteri Dagang Temuai, Seni enggau Main Asal mansutka penerang nya maya bejadika Pengerami Makai Lemai Penyerakup PDP enggau PSB diatur ba sebengkah hotel tebilang ditu, malam tadi.
Berebak enggau nya, Presiden PSB, Datuk Seri Wong Soon Koh madahka siti komiti besai deka ditumbuhka dikena ngelanggur agenda ti dipejalaika gempung ari kedua-dua parti nya.
Soon Koh ke mega Kaban Kunsil Nengeri (ADUN) Bawang Assan madahka, gempung kededua parti nya ila deka betuaika Datuk Seri Tiong King Sing ke lalu nyadi presiden parti.
“Udah tentu bisi pekara silik deka diputar enggau manah.
“Aku pechaya nengah pengelurus ati sereta ulah meri enggau nerima, dia semua pekara ulih diputarka enggau mujur antara PDP enggau PSB,” ku terang iya.
Sama bisi ngulu pengerami tu, bala Sapit Presiden PDP Datuk Henry Harry Jinep, Datuk Dr Penguang Manggil, Rolland Duat, Mandal Presiden PDP Friday Belik, Sapit Presiden PSB Dr Johnical Rayong, Sekretari Besai PSB Baru Bian enggau ke bukai.-TVS
