SARATOK, 19 Ogos: Pemidang siku lelaki pemadu tuai ba Malaysia, niang Seliman anak Bandang pagi tadi deka meruan dikeingatka Kaban Kunsil Nengeri (ADUN) Kalaka Mohamad Duri.
Ku Mohd Duri, niang siku orang ke kala meransang iya maya agi ba sekula primari iya nya minta iya belajar bebendar ngambika nyadi orang ke menyana lebuh udah besai.
“Aku amat sinu meda pendiau iya, suba chukup sigat sereta kering tang maya aku datai ngabas iya udah enda dapat agi semina gegaring ba atas katil.
“Aku chukup semak kaul enggau sida niang sebilik tambah mega mua niang nyau deka sebaka enggau mua niang apai aku empu,” ku iya maya ngenataika penyinu ati ngagai sida niang Seliman sebilik, sehari tu tadi.
Nangkan ke nya, ku Mohd Duri pemidang Seliman siti pengelenyau besai ngagai Sarawak enggau Malaysia sereta rebak diatu.
“Nyadi, aku ngarapka Tuai Rumah Mulok enggau sida sebilik, baka bakih, uchu ichit iya terus besabar nerima penguji tu lalu arapka sida ulih neruska pengidup baka selama.
“Kitai chukup meretika pekara ke diasai sida lalu ngarapka kaul kitai meruan rat,” ku iya.
Berebak enggau nya, anak niang Seliman iya nya Tuai Rumah Mulok ari Klua Krian maya dirandau TVS madah jaku pesan kepenudi ari niang iya nya minta raban purih pantis sida mesti ngembuan adat basa enggau temuai kelimpah patut seruran begulai manah enggau semua orang.
Ku iya, niang apai iya kala mesan iya empu lebuh nyadi ketuai patut ngembuan ati ke baruh sereta nelap ngambika ulih ngiring orang bukai.
“Pesan kepenudi ari apai, enti kitai nyadi ketuai kitai mesti ngembuan ati ke baruh sereta nelap ngambika ulih ngiring orang bukai,” ku iya.
Pia mega, ku Mulok, niang kala mesan bala uchu ichit iya enda tau enda ngayanka adat basa ngagai temuai nyema bisi datai niki ke rumah panjai.
“Jaku ajar iya enti bisi temuai anang semuti nilik naka mua pintu.
“Kitai patut ngulu temuai ke ruai anang kitai meda naka pemetung aja lalu nikal.
“Pesan iya laban tua enda nemu maya tua tau datai ba menua orang. Enti kitai datai ba menua orang, dia orang tentu ingatka pemanah budi kitai,” ku iya. -TVS
