KUCHING, 18 Ogos: Sepengudah abis episod keterubah program pemadu baru TVS, ‘Crocodile Byte’, Episod 2 deka dirichahka nengah penatai Trio Crocs ti deka beratika buah penemu ti dibantai raban penyereta.
Peneleba enggau pengelandik sida deka mantaika perampa ke kondusif endur ngerembaika konsep dagang ke baru.
Antara panel ti bisi ngambi bagi iya nya pemungkal Konsortium Bumi Consultants And Services, Dato Ir. Janang, pemungkal Icube Innovations, Dato Patrick Liew Chin Joon enggau Tuai Pegawai Eksekutif Karuna Sarawak, Melvin Ong.
Episod 2, Crocodile Byte deka mantaika dua penyereta ke chukup tebalan iya nya Jane ari Ecophoria Naturals Plt ti deka mantaika produk organik dalam bidang penganta diri.
Kelimpah ari nya, Azman Marican ke mega pemungkal Berwawasan Able Ride iya nya sebuah aplikasi inovatif dikena nangkup sektor pengangkut.
Anang enda ingat meda program Crocodile Byte ninting Hari Satu, pukul 8:45 malam ba Channel TVS 122 di Astro enggau MYTV.
Udah nya, tandu program tu ulih dipeda ba Youtube Pemerindang TVS ninting Hari Enam, pukul 12 tengah hari, berengkah 19 Ogos 2023.-TVS
