TUSUN 1
Semua rumah panjai udah disikap infrastruktur pemun
PARLIMEN Betong antara bagi menua ke chukup jampat mansang sereta nyamai dikemujurka raban pengari rayat perintah Gabungan Parti Sarawak (GPS) beduduk ari kerejasama rayat sereta penegap politik ba menua nya.
Kaban Parlimen (MP) Betong, Dr Richard Rapu madah ari sukut infrastruktur pemun baka jalai raya tau dikumbai semua udah datai jalai nuntung pala tangga diri baik nya genturung pendiau tauka rumah panjai.
“Ambika chunto di Saribas semua genturung pendiau udah datai jalai. Udah nya, ungkup Layar semina siti dua apin ngembuan jalai ke manah.
“Nangkan ke nya, di Bukit Saban mega 100 peratus udah datai jalai,” ku iya maya Randau Eksklusif enggau TVS ba Palan Servis Parlimen Betong di Kuching, apin lama ke udah.
Bekal Karan enggau Ai
Ngelansa pasal pemansang bekal karan 24 jam ba sitak Parlimen Betong, Dr Richard madah, semua rumah panjai udah nerima pemansang nya semina rumah-rumah baru didiri aja empai bisi lalu sida tu dikumbai ‘peminta laun’, ku iya.
“Semua tiga sitak Kunsil Nengeri (DUN) dibaruh Parlimen Betong baka DUN Saribas, Layar enggau Bukit Saban bela udah datai 100 peratus ba siti-siti endur.
“Pia mega enti nyerita pasal bekal ai ba tiga sitak DUN nya tadi bela udah datai bekal ai nyengkaum nerima bekal ai alternatif (Tekat Ai Bukit) lebih agi ba menua ulu.
“Nya alai, bekal ai beresi tu ba Saribas, Layar enggau Bukit Saban kira nadai tentu isu semua udah bisi bekal ai. Semina ba menua ulu agi deka dikemansang ngambika bulih bekal ai beresi,” ku iya.
Servis Telekomunikasyen
Ungkup servis telekomunikasyen baka arus telefon enggau internet bepelasarka ripot ari Komiti Telekomukasyen enggau Multimedia Malaysia (SKMM) kena ujung taun 2022 urung 79.89 peratus kandang endur ba Parlimen Betong udah datai bungkur arus telekomunikasyen.
Kelimpah ari nya, mayuh mega tower telekomunikasyen baru didiri asil ari inisiatif Perintah Besai enggau Perintah Nengeri.
“Kedua nya bisi udah didirika tiang tower tang apin bisi pemanchar laban ari perati aku chukup mayuh atur ngaduka nya (arus penyambung).
“Semua pemujur pengawa tu tadi ketegal penegap politik ba Parlimen Betong kenyau ari taun 70-an laban kitai endang segulai sejalai enggau perintah sereta enda kala limpang.
“Nya ngujungka pengari rayat chukup nyamai ngatur pemansang ari pegai perintah Barisan Nasional (BN) nyentuk diatu GPS,” ku iya.
Politik Pemansang
Beduduk ari mayuh pemansang udah dirandang bala ketuai politik ke dulu agi dia Dr Richard madah diri laban ke agi baru (nyadi MP) dia iya beterima kasih ngagai semua sida lebih agi ngagai Ex-Sapit Kepala Menteri Datuk Patinggi Tan Sri Alfred Jabu Numpang laban udah mayuh mai pemansang ngagai menua Betong.
Pengawa pemansang nya tadi terus ditampung Sapit Premier Sarawak, Datuk Amar Douglas Uggah Embas ke mega ADUN Bukit Saban sereta dibantu bala tuai bukai baka Ex-Kaban Parlimen Betong Datuk Robert Lawson Chuat, Ex-ADUN Saribas Datuk Wahbi bin Abang Junaidi sereta disambung ADUN Saribas Mohd Razi Sitam.
Udah nya di Layar, pengawa pemansang ditampung ADUN iya, Dato Gerald Rentap Jabu. Nya alai, Dr Richard madah iya deka terus bekerejasama meri sukung ngagai tiga ADUN ba sitak Parlimen Betong dalam ngemujurka bemacham program pemansang ke udah dilanggur.
Antara pengawa pemansang ke benung chakah diadu ba sitak Betong baka ngemanahka jalai alun, ngaga Padang Bilun Menasan Pandak di Bebuling, Spaoh, Projek Jalai ‘Second Trund Road’ ari Penom-Pasar Betong lalu ngelayang Batang Layar.
Udah nya, jalai kedua nya deka disambung ngagai Jematan Bebangai ke diatu ti deka diganti enggau jematan baru lalu rembus ke Padang Bilun Mit Bebuling, Spaoh enggau Paku Central.
Nangkan ke nya, siti agi jalai projek ‘Second Trunk Road’ deka rembus ke menua Sri Aman ngelayang Batang Lupar lalu pansut ba Lidong.
“Nyadi enti projek jalai tu udah tembu ila, dia mensia mayuh ari Betong deka ke Simanggang chukup dampih,” ku iya seraya madah projek nya udah dikemendarka perintah.
Diatu projek nya udah bejalai lalu berengkah digaga ari Simpang Paku terus ngagai Ulu Krian sereta pansut ba Pakan.
“Pangka ari projek jalai tu ila menua kitai deka tebuka,” ku terang iya nyemetak.
Penumbuh BDDA
Inisiatif perintah Sarawak dibaruh iring Premier Sarawak Datuk Patinggi Tan Sri Abang Johari Tun Openg ti numbuhka Ejensi Pemansang Bagi Menua Betong (BDDA) antara program besai ti nyendiaka agih belanja ninting taun.
Kelimpah ari BDDA, bisi mega program ke mit-mit dipejalaika perintah nengeri di Betong baka Projek Transformasyen Menua Pesisir (RTP) enggau ari Perintah Besai iya nya Projek Mesra Rakyat enggau ke bukai.
Asil ari batang aum kepenudi BDDA, dia Chairman iya, Datuk Amar Douglas Uggah Embas udah minta semua ADUN milih projek ke pemadu berat tauka patut digaga enggau jampat sereta ulih tembu dalam taun tu nguna agih belanja ke udah disedia.
Ungkup BDDA, agih belanja ti udah dikemendarka perintah nengeri iya nya urung RM1.5 bilion lalu komiti bela setuju magi belanja sebela ungkup semua sitak DUN ke dibungkur BDDA iya nya Beting Maro, Saribas, Layar, Bukit Saban, Kalaka, Krian, Kabong enggau Lingga (dibagi setengah laban setengah agi sitak tu dikemansang dibaruh Ejensi Pemansang Bagi Menua Sri Aman tauka SADA).
Pemansang Pelajar
Pekara pelajar antara sukut pemadu dikemeratka bala tuai enggau semua ejensi ke bekaul laban tu nyadi sebagi ari kunchi pemujur agenda pemansang di Betong.
Beduduk ari nya, sekeda program ti numpu ngagai pengelandik teknikal bisi disedia ba palan pelajar ngambika raban nembiak ulih ngansal penemu diri sekalika tikas setipikit tauka diploma lebih agi dalam bidang Pelajar Latih Teknikal enggau Vokasional (TVET).
Antara palan pelajar ke bisi dibuka di Betong endur raban nembiak lepas Setipikit Pelajar Malaysia (SPM) nampung pelajar baka Politeknik Metro, Palan Penyulut Teknikal Sarawak (CENTEXS) Kampus Betong enggau Kolej Komuniti (baruh Opis Menteri Pelajar Tinggi tauka IPT).
Raban nembiak di Betong endang chukup begunaka palan pelajar tu laban dunya diatu majak mansang lalu Sarawak endang begunaka raban tebangkar munyi ku udah disebut Premier Sarawak.
Berebak enggau nya, ku Dr Richard Sarawak ditemu nyadi nengeri ke benung ngerandang ekonomi baru lalu begunaka raban nembiak ke bepenemu ba bidang Sains, Teknologi, Injiniring enggau Matematik (STEM).
“Nya alai, udah datai maya iya sitak Betong dibuka palan pelajar ke lebih besai laban ke bepalan ba tengah-tengah menua Sarawak ngambika nyamai raban nembiak ke diau besemak milih palan endur belajar,” ku iya.
Lebuh ditanya senentang isu tauka penanggul belanja ba raban nembiak ke deka nampung pelajar dia Dr Richard madah, penanggul baka nya tetap bisi tang ulih diputar nyema sida betanya sereta nemu ngenataika peminta ngagai Yayasan Sarawak.
“Nuju raban nembiak ke udah bulih pemutus peresa ke manah, nyema bisi penanggul bekaul enggau belanja anang sanggu nerima kangau belajar sekalika ba Palan Pelajar Tinggi Perintah (IPTA) tauka Palan Pelajar Tinggi Peribit (IPTS) laban pengudah sida datai ba palan belajar nya sida deka dibantu ngulihka jali ari ejensi ke bekaul,” ku iya.
Pemansang Pekara Lumba enggau Main
Lebuh dipinta nerang bekaul enggau pemansang pekara lumba enggau main ba Betong, Dr Richard madah agi tubah perengkaguna lumba enggau main ke menyana patut ditambah ba menua nya.
Ku iya, diatu main hoki chukup mayuh sekula primari enggau sekondari di bagi menua tu ngembuan juluk deka nganjung bala nembiak masuk pekit tang tejanggal ketegal agi nadai perengkaguna ke nemban dikena sida belatih.
Nya alai, Dr Richard Rapu ngarapka udah tu ila deka bisi sebuah stadium hoki digaga ba bagi menua Betong ke guna raban nembiak sereta sekula ti rinduka main nya.
“Taja pia, aku meri terima kasih ngagai ketetiga sitak DUN (Saribas, Layar enggau Bukit Saban) laban udah tu kitai deka bisi siti Kompleks Lumba ba Spaoh dibaruh pegai Bukit Saban.
“Pia mega, di Debak sebuah Stadium Betutup nyau deka tembu,”ku iya.
Nangkan ke nya, Dr Richard madah penembu projek stadium nya chukup beguna ngambika bisi endur raban nembiak terus regas ba pengawa lumba.
Berebak enggau nya, iya madah di Betong chukup mayuh bakat sekalinya ba main tinju, angkat berat, nimbakka laja, bowling padang enggau ke bukai tang mih bakat nya nyangka nadai peluang dikerembai ketegal ti agi nadai perengkaguna ke nemban.
Udah nya, nitihka ripot berita dibantaika TVS sebedau tu, Kaban Kunsil Nengeri (ADUN) Saribas Mohd Razi Sitam madahka Projek Kompleks Lumba Debak diatu udah datai ba renggat ke penudi tauka manggai 95 peratus tembu digaga dibaruh kemata Kaunsil Pelilih Betong.
Razi madah projek kompleks lumba nya nelan belanja sepenyampau RM8.9 juta lalu deka disikap enggau sebuah trek sintetik, padang bol, palan entepan kerita, panggau lumba enggau ke bukai lalu disadang tembu penuh September 2023.
Ansah Bakat Nembiak Dalam Bidang Lumba
Lebuh ngelansa pasal Pekit Olahraga Kaunsil Lumba Sekula Betong (MSSB) Renggat Ke-19 ke baru tembu apin lama dia Dr Richard madah diri endang meri sukung penuh ngagai pengawa nya laban ulih nyadi siti pelasar ti nemban dikena nempa modal mensia ti ngembuan pikir runding kelas satu.
“Bidang lumba nyadi siti pelasar pemadu nemban dikena nempa nembiak ti regas tubuh enggau runding kelimpah dikena nempa daya pikir modal mensia kelas satu.
“Ari latih ti meruan sereta sebela ari bemacham sukut pengawa lumba mega ulih nyeliahka raban nembiak ari ngereja ulah ke enda menuku,” ku tandu iya.
Ungkup penemu, Pekit Olahraga MSSB Ke-19 ke diatur berengkah 8 nyentuk 11 Ogos tu tadi ngemataka gelar champion penuh dipenggi Sekula Sekondari (SMK) Saint Augustine, penuduk kedua SMK Saribas enggau penuduk ketiga diempu SMK Saratok.
Ba pengujung pekit nya ngemataka sekeda nembiak nerima perais atlit pemadu nyulut MSSB Ke-19 nitihka kategori iya nya Stanley Harry anak Alin ari SMK Saribas bulih gelar atlit lelaki pemadu nyulut kategori baruh 14 taun pengudah mujur bulih emas ba achara nikau peluru enggau nikau sangkuh (pirak).
Gelar atlit nyulut indu kategori baruh 14 taun dipenggi Clarita Jawai Kunsil ari SMK Datuk Patinggi Kedit pengudah ke bulih dua midul emas ba achara nikau pirin besi enggau nikau peluru.
Udah nya, Nur Mazlinawaty Abdullah (kategori baruh 12 taun) ari SMK Kabong bulih dua midul emas ba achara 100 meter enggau 200 meter.
Ba kategori atlit pemadu nyulut lelaki baruh 15 taun dipenggi Ameer Zaqwan Laksamana ari SMK Kabong pengudah ke bulih dua midul emas ba achara 200 meter enggau perejuk tinggi.
Pemenang atlit pemadu nyulut indu ba kategori ke sama dipenggi Annabella Vilyaryntha Bali ari SMK St Augustine pengudah ke menang dua midul enggau siti pirak ba achara 800 meter (emas), 1,500 meter (emas) enggau 400 meter (pirak).
Siku agi atlit indu pemadu nyulut ba kategori baruh 15 taun iya nya Veronica Ema Mujah ari SMK Datuk Patinggi Kedit Betong ke bulih dua midul emas enggau siti pirak ba achara 400 meter (emas), 100 meter (emas) enggau nikau sangkuh (pirak).
Nangkan ke nya, gelar atlit lelaki pemadu nyulut ba kategori baruh 18 taun dipenggi Marcellino Jimmy Alin ari SMK Saribas ke bulih tiga midul emas ba achara perejuk jauh, 110 meter belanda bepagar enggau 100 meter.
Ungkup atlit pemadu nyulut indu kategori baruh 18 taun dipenggi Elizabeth Munda Lamban ari SMK Saratok ke bulih dua midul emas ba achara 100 meter enggau 200 meter.
Siku agi bakat baru ke majak pegari nama asal ari Rumah Panjai Stambak Ili, Betong iya nya Daeloniel Mc Delon tauka digelar Kilat Boy udah mujur ngangkatka nama diri ba main tinju.
Pemujur besai ke udah dijapai Kilat Boy lebih agi ba tikas antarabansa baka champion Pekit Tinju Profesional di Pakistan (2022) dikearapka ulih nyadi peransang ngagai semua raban nembiak lebih agi di Sarawak enggau Betong.-TVS
Betampung
