DEBAK, 16 Ogos: Sepengudah suah minta diatu Pasar Debak udah mujur disikap enggau sebuah mesin ngeluarka duit tauka Automatic Withdrawal Machine (ATM) keterubah ari Bank Betanam Betupi (Agro Bank).
Sapit Menteri Pemansang Indu, Nembiak Mit enggau Pengelantang Komuniti, Mohd Razi Sitam madah, bemacham inisiatif udah dipejalaika iya sekumbang dalam timpuh sepuluh taun ke udah dikena ngemujurka pekara nya.
“Puji Tuhan asil ari pengepuh berunding enggau mayuh bengkah bank ngelama tu diatu sebuah mesin ATM udah mujur dibuka ba Pasar Debak ungkup pengelantang rayat ke diau besemak,” ku iya.
Razi ke mega Kaban Kunsil Nengeri (ADUN) madah munyi nya ngagai TVS pengudah tembu Pengawa Nyuaka Insentif ngagai Ex-Nembiak Sekula Sekondari (SMK) Saribas ke nyulut ba pemutus peresa Setipikit Tinggi Pelajar Malaysia (STPM) enggau Setipikit Pelajar Malaysia (SPM) taun 2022 di Diwan Millenea ditu, kemari.
Beduduk ari nya, Razi ngarapka mesin ATM ke baru dibuka nya ulih meri pemaik ngagai mensia mayuh.
“Ungkup pemungkal diatu kitai mesin ATM dulu lalu ba awak ke sama aku mega bisi minta sida bank nyendiaka Mesin Nyimpan Duit (CDM) nyadi diatu semina ulih ngambi duit aja.
“Arapka pemisi perengkaguna tu ulih mantu mensia mayuh ke begaut begunaka belanja sereta enda ibuh kiruh nurun jauh ketegal ngiga ATM ke Pasar Saratok tauka Pasar Betong,” ku iya.
Nangkan ke nya, Razi mega madahka perambu bisi ngasuh Agro Bank numbuhka pampang mit ‘Agro Corner’ ba Pasar Debak.
“Kitai endang kala berunding enggau raban Agro Bank deka muka ‘Agro Corner’ tang laban bisi sesetengah pekara ke mesti dititihka enggau begunaka pemutus ari Indu Opis Agro Bank di Kuala Lumpur nyadi pekara nya tejanggal.
“Arapka dudi hari juluk kitai deka nyendiaka siti Agro Corner tauka Pampang Mit Agro Bank di Debak ditu ulih nyadi nyata,” ku iya.
Ungkup penemu, ngelansa pasal pengawa ke diatur sehari nya bisi 39 iku nembiak ari SMK Saribas ke nyulut ba peresa SPM enggau STPM nerima insentif pelajar.-TVS
