ENGKILILI, 15 Ogos: Palan belelak di Jelukong ditu tauka dikumbai Rest And Services Area (RSA) Jelukong deka dibuka bulan Januari 2024.
Menteri Kereja Raya Malaysia, Dato Sri Alexander Nanta Linggi madah naka tu palan nya tembu digaga 83.3 peratus.
“RSA ba Jelukong tu gaya dipeda nyau deka tembu lalu nitihka penerang ngagai aku tadi palan tu deka dibuka bulan Januari (2024).
“Diatu pengawa ngaga RSA Jelukong udah manggai 83.3 peratus,” ku iya.
Nanta ke mega Kaban Parlimen Kapit madah munyi nya maya aum pemberita nyerumba Pengawa Matau Projek Palan Belelak (RSA) Jelukong, kemari.
Nangkan ke nya, Nanta madah kelimpah bisi disikap enggau perengkaguna ke bekaul palan nya mega deka bisi agu, surau sereta palan endur bedaja tauka tamu mit.
“Perengka guna ditu ila iya nya palan bejual pemakai enggau ai irup lalu bisi alai belelak mega enggau palan betamu ngagai bala pedaja,” ku tandu iya.
Ungkup penemu, pejalai Nanta kemari disempulang Sapit Premier Sarawak Datuk Amar Douglas Uggah Embas matau Projek Pan Borneo ke mungkur jalai sepanjai 786 kilometer (km) pengelama dua hari dikumbai ‘Jelajah Eksplorasi Jelajah Lebuhraya Pan Borneo Sarawak’ berengkah ari Kuching nyentuk ke Miri.
Sama bisi datai dua Sapit Menteri Infrastruktur enggau Pemansang Penyangkai Kapal Sarawak, Ir Aidel Lariwoo Enggau Datuk Majang Renggi sereta ke bukai.-TVS
