TANJUNG MANIS, 13 Ogos: Perintah Sarawak deka ngaga sebuah hotel baru bekelas tiga bintang di pelilih mit Belawai, ku Datuk Patinggi Tan Sri Abang Johari Tun Openg.
Premier Sarawak nya madah, pengawa ngaga hotel nya endang sebengkah ari pengawa perintah dikena matak temuai lebih agi ari menua luar datai ke sitak nya.
“Kitai deka ngemansangka hotel tiga bintang ba Belawai laban endur nya enda jauh ari sitak Tanjung Manis.
“Pia mega, iya deka meri pemaik ngagai komuniti ke diau besemak nyengkaum ari Kampung Jerijih enggau Kampung Belawai empu,” ku iya.
Iya madah munyi nya maya Pengawa Nangguhka Safari Nginti Tanjung Manis 2023, Renggat Ke-17 nyerumba Pengerami Jubli Emas 50 Taun Ejensi Pemansang Kayu Ramu Sarawak (PUSAKA), pagi tadi.
Nerang silik, Abang Johari madah, perintah nengeri mega deka ngaga sebuah padang golf ba sitak nya awak ke iya ulih nyadi sebengkah aktiviti baru kelimpah ari nginti.
“Kededua projek nya, iya nya ngaga hotel enggau padang golf, udah dipasuk dalam Langgur Pemansang Malaysia Lumpar Ke-12 (RMK-12).
“Kelimpah ari nya, iya mega nyengkaum pemansang perengkaguna di sitak tu lalu kitai ngempu tanggungpengawa nyaga rampa menua ti nyadi pematak penatai orang luar,” ku iya.
Dulu ari nya, Abang Johari bisi nyuaka perais ngagai pemenang Pekit Nginti Ungkup Kategori Tasik Dalam, iya nya dipenggi Tim Dato Mohd Naroden Majais ke mujur bulih ikan tenggiri pemerat 8.6 kilogram (kg).
Ungkup pemenang Pekit Nginti Kategori Tebing Tasik dipenggi Adillah Ali ke mujur bulih ikan pari pemerat 28.4 kg. -TVS
