KUCHING, 13 Ogos: Presiden Gerempung Anak Seni Iban Malaysia (PASIMA) Isa Lee ngelalau rebak baru ti bisi juluk ngembuan singkang ke jauh dalam karier nyadi penanyi patut ngubah chara berunding.
Ku iya, sesiku orang nya enda tau meragamka karier nyadi penanyi semina nitih aja tang patut ngaga karier muzik tauka nyadi penanyi tu nyadi lubuk penatai pemisi.
Kebuah pia, ku Isa Lee ngambika seni muzik Iban ulih dikena sida ti mekuhka pengawa belagu ngidupka diri.
“Aku ngarapka kitai (rebak baru) patut ngubah chara berunding.
“Kitai enda tau ngumbai tauka ngasai karier nyadi penanyi tu semina rindu ati tauka nitihka orang aja.
”Enti ulih aku deka karier muzik tauka pengawa nyadi penanyi tu nyadi lubang penatai pemisi,” ku iya.
Isa Lee mansutka penemu nya maya program Dialog TVS bejuraika pejuluk : Kuing Tuju Seni Muzik Iban ke dipancharka terus nengah channel TVS, empai lama.
Ngelansa pekara bekaul, Isa Lee madahka PASIMA diatu benung ngatur Pekit Bintang Lagu Klasik Iban ke alai diatu udah masuk pengawa milih pemekit ba renggat semi final ke deka diatur kena 2 September tu.
Ari 20 iku pemekit ke bisi masuk semi final nya, 10 iku ari sida deka dipilih masuk rengat final ngerebut gelar champion Pekit Bintang Lagu Klasik Iban Renggat Ke-3 ti deka diatur kena 28 Oktober di kuching.-TVS
