BETONG, 12 Ogos: Sekula Sekondari (SMK) Saint Augustine mujur ngempu gelar champion penuh ba Pekit Lumba Kaunsil Lumba Sekula Bagi Betong (MSSB) Renggat Ke-19.
Tu keterubah iya St Augustine nyapai pemujur nya sepengudah nganti sepengelama 25 taun.
Ketuai Kontinjen (SMK) Saint Augustine, Ahmad Nooraffif Mohamad Nasir madah diri chukup tepantup ati meda pemujur ke dijapai nya sepengudah enam taun iya diberi pangku pengawa nyadi jurulatih sekula nya kenyau ari taun 2017.
“Ba lumba tu endang amat tu mih terubah iya aku dichiri nyadi Tuai Kontijen SMK Saint Augustine taja udah lama nyadi jurulatih kenyau ari taun 2017 suba.
“Nya alai, pemujur tu chukup ngemegah laban kami endang enda kala menang. Terima kasih ngagai kerejasama semua laban taun tu kami ulih menang,” ku iya.
Pengajar Ahmad mansutka penerang nya maya dirandau sepengudah tembu Pekit Lumba Kaunsil Lumba Sekula Betong (MSSB) Renggat Ke-19 Ba Kompleks Lumba Betong, kemari.
Udah nya, Ahmad ngarapka raban atlit SMK St. Augustine terus ransing belatih dikena ngetanka gelar champion nya ba taun dudi.
“Puji Tuhan taun tu asai sepi aku taun ti kelima (aku ngelatih) baru kami mujur bulih gelar champion.
“Nya alai, aku ngarapka ba taun ti deka datai SMK St. Augustine ulih ngetanka penuduk tu,” ku iya.
Berebak enggau nya, Penulung Kanan Pekara Nembiak (HEM) SMK Saint Augustine, Ismail Mohamed madah pemujur nya chukup besai reti enggau sida deka naka ulih ngetanka pemujur nya.
“Tu siti perais ke chukup berega ungkup kami ba SEMESTA laban tu terubah iya SEMESTA ulih menang lalu menggi gelar champion ba Pekit Lumba MSSB Ke-19.
“Nya alai, ba taun dudi kami deka nguji ngetan lalu nentuka gelar tu dipenggi kami baru,” ku iya.
Ungkup rikod, SMK St. Augustine ngempu gelar champion sepengudah tegumpulka 31 midul emas, 21 midul pirak enggau 16 midul engkeraju.
Penuduk lumur dua dipenggi SMK Saribas nengah pemujur bulih 18 midul emas, 15 midul pirak sereta 11 midul engkeraju.
Udah nya, lumur tiga dipenggi SMK Saratok pengudah semina bulih 12 midul emas, 17 midul pirak enggau 15 midul engkeraju.
SMK Saratok serak tu puntan ngetanka gelar champion ke dijapai sida dua taun bejurut sebedau tu.-TVS
