BETONG, 12 Ogos: Pengawa lumba enggau main siti pelasar ti pemadu nemban dikena nempa modal mensia ti regas batang tubuh sereta ngembuan daya pikir kelas satu.
Ku Kaban Parlimen Betong, Dr Richard Rapu, nengah latih ti meruan ba pengawa lumba ulih narak pemanah ulah raban nembiak laban sida orang dikeandal nyadi ketuai dudi hari.
“Bidang lumba nyadi siti pelasar pemadu nemban dikena nempa nembiak ti regas tubuh enggau runding.
“Ari latih ti meruan sereta sebela ari bemacham sukut pengawa lumba mega ulih nempa ulah siku-siku nembiak,” ku iya maya dirandau TVS maya nutup Pekit Lumba Kaunsil Lumba Sekula Bagi Betong (MSSB) ba Komplek Lumba Betong, kemari.
Tandu Dr Richard, ari pengawa lumba mega nembiak ulih nyeliahka diri ari ngereja ulah ke enda menuku.
“Aktiviti lumba ke dikemeran sepanjai maya ulih nyeliah nembiak ari ngereja pengawa ke enda menuku.
“Sida deka seruran ngembuan semangat ke tinggi lebuh bepekit,” ku iya.
Nya alai, ku Dr Richard mensia mayuh patut sedar ari pengawa lumba kitai ulih ngemansangka modal mensia ke ngembuan runding pikir kelas satu lalu bepenau nyadi ketuai dudi hari.
Sama bisi datai Pegawai Opis Pelajar Pelilih Bagi Betong, Awet Gapor, Prinsipal SMK Saint Augustine Betong ke mega Tuai Komiti Pengatur Lumba MSSB Renggat Ke-19, Chairman Kaunsil Kepala Pengajar Zon Betong, Christopher Saing enggau ke bukai. -TVS
