BETONG, 11 Ogos: Pemadas perintah nengeri nengah Kaunsil Makit Betanam Betupi Perintah Besai (FAMA) bisi nyendiaka palan endur nambahka penatai belanja dipuji bala pedaja.
Siku pedaja ba Pasar Tani Betong Uri Sabar, 51 ngarapka diri terus mujur bedaja ba endur ke disediaka raban bekaul dikena iya nyaup sida sebilik nambahka penatai pemisi.
“Arapka pengawa tu mujur mih baka kami ke bejual ba Pasar Tani tu.
“Orang ke meli sida datai nitihka pengelantang diri, tau lemai hari. Nyema sida enggai pagi enggai berumban angkat dani pagi ulih meli sayur lemai hari ga.
“Kekadang pagi orang berumban nganjung bala anak sekula bisi kereja bukai baka gawa semua. Nyadi pemisi palan baka tu dibuka malam hari manah amat,” ku iya maya dirandau pengari TVS ba Pasar Tani Betong, kemari.
Udah nya, ba penemu siku agi pedaja ti bejual engkayu babas baka upa iya nya Mai Ngali, 65 iya mega meri terima kasih ngagai perintah laban udah numbuhka Pasar Tani Betong.
Ku iya, sekumbang udah dibuka palan nya chukup manah laban bisi endur raban ke udah lunggar umur baka iya begigaka anak belanja.
“Meri besai terima kasih ngagai perintah ke udah nyendiaka endur kami betamu baka Pasar Tani tu.
“Tu mih utai ke manah manah endar laban udah meri peluang alai kami bedaja.
“Ba aku siku, ari pengawa baka tu bisi ga endur aku nambahka belanja dikena nupi bala uchu ti udah baka patu balu,” ku iya.-TVS
