MIRI, 11 Ogos: Rayat Sarawak patut berasai temegah laban nengeri tu ukai semina nyadi chunto penyerakup rayat pupu bansa enggau pengarap di Malaysia tang mega ngagai dunya.
Sapit Menteri Pemansang Indu enggau Anak Mit Sarawak Datuk Rosey Yunus madah nengeri tu endang chunto penyerakup pupu bansa ti bepelasarka konsep Segulai Sejalai.
“Aku meransang rayat di Miri bela ngitang Jalur Gemilang ba genap opis perintah, opis peribit, genturung pendiau, rumah panjai sereta entukar diri dikena mandangka penyiru ngagai menua sereta ngerichahka bulan kebangsaan taun tu.
“Nya alai, terima kasih ngagai Opis Pemadah Malaysia laban seruran ngatur aktiviti kimpin dikena nerenak semangat patriotik dalam komuniti,” ku iya.
Rosey ke mega Kaban Kunsil Nengeri (ADUN) Bekenu madah munyi nya maya bejadika Program Kembara Merdeka Jalur Gemilang (KMJG) 2023 diatur ba pelaman Kompleks Islam Miri, kemari.
Ungkup rikod, konvoi mai Jalur Gemilang nya neresa pasar Miri sereta disempulang bala staf trafik ari Balai Polis Trafik Miri sebedau neruska pejalai ke bandar Limbang enggau Lawas ditangkan rembus ke nengeri Sabah.
Sama bisi datai Residen Bagi Menua Miri Jamalie Busri, Sapit Tuai Polis Pelilih Miri Supritenden Mohd Sabri Zainol, Pegawai Admin Opis Pelilh Miri Edward Tawang, enggau Temenggong Dato Abdul Rahman Abang Fadzail.-TVS
