BETONG, 11 Ogos: Aktiviti ‘berkayak’ enggau nginti dikeandal nyadi aktiviti ke ulih matak penatai temuai ngagai Pasar Tani Betong udah tu.
Chairman Pasar Tani Medan Betong, Wan Halmi Wan Omar madah, ninting minggu komiti pengatur seruran bisi mantaika program baru ba Pasar Tani Betong dikena matak penatai mensia mayuh.
“Ninting minggu kitai bisi ngatur program ke nyelai.
“Ambika chunto minggu ke udah kitai bisi minta temuai belagu enggau ke bukai.
“Udah tu kami merambu deka ngatur pengawa main atas ai tauka aktiviti nginti, bekayak sakai satu sakai dua dikena pematak temuai ngusung Pasar Tani Betong ke dibuka berengkah pukul 4.00 ngagai pukul 6.00 lemai ba Tasik Medan ditu,”ku iya.
Wan Halmi madah munyi nya ngagai TVS pengudah ngemataka pengerichah Pasar Tani Dataran Tasik Medan ditu kemari.
Udah nya, lebuh ngelansa pasal timbal ari mensia mayuh ngelawa Pasar Tani Betong naka tu, Wan Halmi madah timbal ari mensia mayuh enggau pedaja chukup manah.
Ku iya, semua 65 buah bansal ke disediaka Kaunsil Makit Betanam Betupi Perintah Besai (FAMA) ungkup pedaja nyau enda chukup.
“Genap minggu penatai mensia mayuh endang bisi nambah ukai semina ari orang ke datai aja tang peminta sida ti deka bejual mega (agi bisi).
“Nya alai, nyentuk ke bisi deka nirika bansal kediri empu laban bansal ke disediaka FAMA enda chukup,” ku iya.
Ungkup penerang, Pasar Tani Betong dibuka ngagai mensia mayuh berengkah ari pukul 4.00 lemai ngagai pukul 10.00 malam ninting Hari Empat nyentuk Hari Enam ninting minggu.-TVS
