MIRI, 7 Ogos: Perintah sarawak bisi nyendiaka turu belanja urung RM10 juta ngagai industri kreatif Sarawak lalu belanja nya ulih dipinta nengah chara dalam tali arus (online).
Raban pemekuh industri kreatif ulih minta agih belanja nya dikena ngatur program tauka woksyop ti meri pemaik ngagai komuniti, ku Dato Snowdan Lawan.
Sapit Menteri Dagang Temuai, Industri Kreatif enggau Seni Pemerindang Sarawak, nya madah raban nembiak sigi diperansang minta turu nya tebal agi sida ke chakah dalam industri kreatif baka fesyen, ngaga tempa tukuh, filem sereta ke bukai.
“Agih belanja ungkup industri kreatif tetiap taun semak RM10 juta ti ulih dikena kitai ngatur woksyop.
“Woksyop tu enda ngira sekalika tempa tukuh, fesyen, filem, fotografi sereta semua program bekaul enggau industri kreatif.
“Tu mih turu ke ulih dipinta bala kita. Kita ulih minta sechara dalam tali arus ba laman web opis menteri kami. Nyadi kita mesti nguna manah turu nya,”ku iya.
Iya mansutka jaku nya rambau Malam Gala Pekit Keling enggau Kumang Raban Ngepan Iban Tikas Pulau Borneo 2023 ditu empai lama.
“Kita mega ulih minta bantu ari pengari rayat lokal.
“Nya ukai pekara ke salah. Kita mega mesti beterima kasih ngagai pengari rayat laban bisi maya sida meri bantu nguna agih belanja sida empu.
“Nyadi, sida ke nyadi pengari rayat ba sesebengkah sitak nya sigi ulih meri bantu,”ku iya.
Kelimpah ari nya, iya meransang gerempung minta agih belanja dikena ngatur program ke ngaul adat enggau main asal.
Ku iya madah, nya siti chara ke tau mantu bedajaka sereta nyaguka adat enggau main asal bansa diri.-TVS
