SIBU, 7 Ogos: Sarawak deka begunaka mayuh raban graduet ti ngembuan pengelandik dalam bidang pemikir data seriris enggau juluk nyadi nengeri bepenatai pemisi tinggi manggai taun 2030.
Premier Sarawak, Datuk Patinggi Tan Sri Abang Johari Tun Openg madahka, rayat nengeri tu patut nengkira diri dalam bidang nya laban data disempama baka minyak dudi hari.
“Data iya nya ‘minyak’ ungkup jemah ila. Aku ngarap rayat Sarawak nengkira diri.
“Nya alai, kitai begunaka mayuh pemikir data,”ku iya.
Iya madah munyi nya maya bejaku ba Pengerami Konvokesyen Ke-7 Universiti Teknologi Sarawak UTS, kemari.
Nerang silik, Abang Johari madahka, pengelandik ulih macha kod sereta ngelindung kod data mega beguna dikena nentuka data nya seruran tejaga.
“Data endang utai ti berega lalu mesti dijaga.
“Kitai mega begunaka pengelikun siber dikena ngelindung data statik sereta data ti ulih ngasuh kitai terus nyingkang ke mua.”ku iya. -TVS
