KRIAN, 6 Ogos: Projek sepenyampau RM1.5 juta di baruh Projek Transformasyen Menua Pesisir (RTP) udah dikemendarka ba sitak Ulu Krian enggau Batang Budu.
Kaban Kunsil Nengeri (ADUN) Krian Friday Belik madah semua projek nya benung dipejalaika ngaul projek perengkaguna ba 12 buah rumah panjai.
“Nyadi semua iya 12 iti projek ke beungkus manggai RM1.5 juta tu udah dikemendar ungkup kitai di sitak (Batang) Budu enggau Ulu Krian aja,” ku iya maya Program Tuai Begulai enggau Rayat ba Rumah Jaga Eddi di Tembawai Emperan, ditu kemari.
Berebak enggau nya, Friday minta bala tuai rumah ba sitak DUN Krian terus nganjung peminta ngagai iya laban diatu bala ari Opis Servis DUN Krian benung nusun rintai projek baru ungkup taun 2024.
“Nyadi diatu udah belabuh ngaduka rintai baru (projek) ke taun 2024 laban rintai baru nya mesti dianjung ngagai Residen ujung bulan September tu,” ku iya.
Berebak enggau nya, maya dirandau pengari TVS dia Penghulu Sitak Krian Ulu, Anyum Kinyeh, 74 meri terima kasih besai ngagai ADUN Krian laban udah ngampitka belanja belanja pemansang ngagai perayat ke dijaga iya.
“Aku meri besai terima kasih ngagai ADUN Krian Friday Belik laban udah meri projek ngagai menua dijaga aku ba Krian Ulu enggau Batang Budu.
“Nyadi nya terang mandangka pemanah pengiruh pengerindu pengari rayat ke rayat tambah mega iya rindu meda pemansang ba rumah panjai ke pemaik kami semenua nengah projek tu (RTP),” ku iya.
Nya alai, Penghulu Anyum meransang raya mayuh lebih agi ba Krian Ulu enggau Batang Budu terus meri sukung ngagai perintah Gempung Parti Sarawak (GPS).
“Projek tu tadi chukup manah ke rayat. Ari nya sida (rayat) deka berunding ke utai ke udah diberi perintah GPS.
“Nyadi utai ke baka tu tadi iya tau narit ati rayat terus segulai sejalai nitihka rambai jaku kitai di Sarawak diatu,” ku iya.
Sama bisi ngulu pengerami nya Sekretari ba Opis Premier, Brian Fung, Ex-Senator, Datuk Douglas Sullang, Penguasa Tanah enggau Survei Betong, Morris Nayup, bala tuai raban bansa enggau ke bukai.-TVS
