SIBU, 6 Ogos: Siku pegawai polis asal ari Sri Aman, Superintendan Dr Collin Babat,48 nempa sejarah diri empu bekau ari pemujur nyadi pegawai polis Iban keterubah nembuka tikas pelajar pemadu tinggi nyentuk renggat Doktor Falsafah (PhD) ba bidang undang-undang ari Universiti Teknologi Mara (UiTM) Shah Alam, Selangor kemari.
Lebuh dirandau pengari TVS, Dr Collin ke mega Sapit Tuai Polis Sibu madahka diri chukup temegah udah mujur nempa sejarah ungkup diri empu, bansa enggau menua.
“Kemari aku tu udah nerima Ijazah Kedoktoran dalam bidang Undang-Undang nyerumba pengawa Konvokesyen UITM ke-97.
“Nya alai, enggau gaga ati aku madahka diri empu aku mih pegawai polis bansa Iban keterubah iya nerima PhD, Undang-Undang di Malaysia enggau di Sarawak ditu,” ku iya.
Berebak enggau nya, Dr Collin meri terima kasih laban berekat ari sukung bala pegawai polis di Bukit Aman enggau mega di Sarawak iya mujur nembuka pelajar diri.
“Nyadi aku ngarika kami sebilik deka meri besai terima kasih jaku sukung, jaku ajar ari pemesai tuai polis di Bukit Aman enggau mega ba Sarawak laban udah meri pemendar ngagai aku belajar ngelama tu,”ku tandu iya.
Beduduk ari nya, Dr Collin meransang rebak baru lebih agi bala nembiak Iban anang mantul belajar, mesti ngapuska pelajar diri ngagai tikas ke pemadu tinggi ngambika dibasa sereta ulih nyaup ngangkatka menua enggau bansa kelimpah ke pemaik diri sebilik dudi hari.
“Aku meransang bala nembiak rebak baru ba dedini endur pekara pelajar nya utai ke chukup beguna laban ari bisi pemandai, diploma, degree, master tauka PhD kitai deka ulih besemekih enggau orang bukai.
“Ari pemandai belajar mega kitai deka diperening tauka dibasa orang.
“Nya alai, nuju bala anak kitai Iban anang ngumbai belajar tu tusah enti kitai deka mujur. Pemedis nya kebendar ulih nyadi mudah ari ingat enggau rindu ngereja pengawa.
“Semina nengah pemujur pelajar pengidup kitai deka lebih lantang dudi hari,” ku iya madah tadi.
Ungkup rikod gawa, Dr Collin kala mangku pengawa nyadi Pegawai Penasat Penyalah ba Indu Opis Polis Pelilih (IPD) Shah Alam Selangor, Pegawai Turus D6 ba Indu Opis Polis Kontinjen Selangor enggau mayuh pangku pengawa besai ke bukai baka nyadi Tuai Begian Pansik Penyalah enggau Pengelikun IPD Miri, Pegawai Kaunsil Pengelikun Kaunsil Pemansang Bintulu (BDA), Pegawai Turus Gerakan, Pasukan Gerakan Am (PGA), Batu Kawa Kuching enggau Pegawai Tusus Pengelantang Mensia Mayuh, Indu Opis Polis Kontinjen Sarawak.-TVS
