SIBURAN, 5 Ogos: Naka tu bisi 619 iku udah dikangau gawa ngisi pangku pengawa tetap nyadi lutur ba Sarawak nengah Opis Menteri Pengerai Malaysia (KKM).
Ku Sapit Menteri Pengerai Lukanisman Awang Sauni, kangau gawa nya dikena mutarka penanggul suntuk lutur ba sepital enggau klinik KKM di Sarawak.
Lukanisman mega madah urung 395 iku lutur udah setuju nerima kangau nya sereta udah ngerejister diri gawa, 50 iku nulak lalu 70 iku agi bedau ngerejister diri enggau apin meri sebarang timbal.
”Berebak enggau nya…bisi 55 iku lutur udah ngerejister diri patut dilatih lalu peminta sida udah dikemendarka KKM.
“Pia mega bisi 49 iku agi ke nerima kangau nya tang agi betangguh datai ke Sarawak.
“Sida setuju dikangau gawa tang nangguhka penatai diri,” ku iya.
Lukanisman ke mega Kaban Parlimen Sibuti madah munyi nya pengudah pejalai gawa ngagai taba Klinik Pengerai Siburan ke baru ba Pasar Siburan, Serian kemari.
Nangkan ke nya, ku iya pengawa ngaga Klinik Pengerai Siburan ke baru nya dipelaba tembu bulan Oktober enggau deka bepun dibuka pun taun 2024.
Lukanisman mega madah Sarawak nerima 36 projek ngenanah klinik repuk beungkus RM8.5 juta dibaruh inisiatif Malaysia MADANI.
Jam ke diatu bisi enam projek udah tembu enggau ke bukai benung digaga.
Iya andal semua projek nya deka tembu dalam Disember 2023, seraya madah KKM benung nambahka agi rintai penyampau klinik repuk ungkup dikemanah taun 2024.-TVS
