SARATOK, 4 Ogos: Rayat mayuh bela besampika pengelantang sereta pengerai Premier Sarawak, Datuk Patinggi Tan Sri Abang Johari Tun Openg beserimbai enggau Hari Pengada iya ke-73 sehari tu.
Pengari TVS, bisi betemu seraya mendingka pesan Hari Pengada nuju Premier Sarawak. Nyadi munyi tu ke pesan ari bala sida:
Kaban Kunsil Nengeri (ADUN) Kalaka, Mohd Duri ngarapka Premier Sarawak meruan gerai sereta terus ngiring Sarawak nyadi nengeri maju.
“Aku deka meri Selamat Hari Pengadan ngagai Yang Amat Berhormat Premier Sarawak lalu ngarapka iya (Premier) meruan gerai sereta panjai umur ngambika ulih ngiring lalu terus mai menua tu nyadi siti nengeri ke likun sereta maju,” ku Mohd Duri.
Nangkan ke nya Tuai Unit Pengatur Lisin, Inspektorat enggau Penerit Adat SMA Steward Sayong ngarapka Abang Johari terus bebendar nagih hak Sarawak baka ke udah dipekat dalam MA63.
“Meri Selamat Hari Pengada nuju Yang Amat Berhormat (YAB) Premier Sarawak lalu ngarapka YAB Premier ulih terus mai pulai hak Sarawak nitih dalam Sempekat Malaysia 63 (MA63) sereta arapka terus ngemansangka Sarawak ari sukut ekonomi enggau pemansang infrastruktur. Selamat Hari Pengada Premier,”ku Steward.
Pia mega enda tinggal meri pesan Hari Pengada ngagai Premier Sarawak, iya nya Pegawai Pelilih Saratok Harun Mahidi ti ngarapka Premier terus diberekat ari sukut pengerai enggau jereki.
“Selamat Hari Pengada Ke-73 nuju Yang Amat Berhomat Datuk Patinggi Tan Sri Abang Johari Tun Openg ngajihka panjai umur murah jereki sereta bepengerai lalu mega mujur mai menua Sarawak nyadi siti nengeri maju manggai taun 2030,”ku Harun.
Ungkup penerang, Abang Johari anak pengkuan ngagai Tuai Pemegai Menua (TYT) Nengeri Sarawak ti keterubah Tun Abang Haji Openg Abang Shapiee lalu iya ada kenaka 4 Ogos 1950.
Mujur nembuka tikas pelajar ba bidang Adminstrasyen Dagang ari Brunel University, United Kingdom.
Abang Johari dichirika nyadi Premier Sarawak kena bulan Januari 2017 bekau ari pemidang niang Pehin Sri Haji Adenan Satem.
Bemacham inisiatif udah dibantaika Premier Sarawak dikena ngangkatka nama Sarawak nuju nengeri maju sereta bepenatai pemisi tinggi manggai taun 2030.-TVS
