KUCHING, 3 Ogos: Tuai Pemegai Menua (TYT) Nengeri Sarawak, Tun Pehin Sri Abdul Taib Mahmud diatu udah beinsur gerai sereta bepelasarka lalau ari lutur, iya dipelabaka deka pulai ke Sarawak enda lama agi.
Sekretari Peribit TYT Nengeri Sarawak, Junih Salleh Ahmad madahka raban Astana ngarapka rayat terus besabar sereta enda mudah pechaya enggau berita sebubu ngapa bekaul enggau pengerai Tun Taib.
“Ngarika raban Astana, sekali agi kami meri jamin ngagai rayat Sarawak sentang gaya pengerai Tun nyau beinsur manah sereta enti nadai penanggul, enggau lalau ari lutur iya empu, iya deka pulai enda lama agi,” ku iya nengah siti penerang, lebuh Hari Empat.
Ku iya, raban Astana endang nyikap diri sentang tanya ari mensia mayuh ti deka nemu senentang pengerai Tun Taib.
“Bisi jamin ari kededua raban Astana enggau Perintah Sarawak sentang iya (Tun Taib) diatu benung diperubat ba menua luar,” ku iya. – TVS
