TOKYO, 3 Ogos: Kerejasama entara Opis Menteri Tanah, Infrastruktur enggau Dagang Temuai (MLIT) Jipun enggau Sarawak mai tuju negapka pengawa ngatur palan penyangkai kapal lebih agi Palan Penyangkai Lapal Samalaju, Bintulu.
Sapit Premier Sarawak Datuk Amar Douglas Uggah Embas diatu ke benung nemuai seraya gawa ke Jipun madahka perintah nengeri deka nunda penyikar menua nya ngatur penyangkai kapal dikena negapka operasyen penyangkai kapal di Sarawak.
“Peneleba Jipun enggau pemujur sida ngatur penyangkai kapal ulih dipelajar kitai.
“Kami mega gagit meda penau kerejasama enggau MLIT dalam negapka operasyen penyangkai kapal Sarawak ngambika lebih sikar sereta bisi daya semekih ke lebih manah udah tu,” ku iya madah.
Uggah ke mega Menteri Infrastruktur enggau Pemansang Penyangkai Kapal Sarawak nerangka komitmen Jipun ba pengawa ngemanah progresif, nguna meruan enggau pengeluar sigi senutuk enggau Juluk Pemansang Ti Meruan (SDG) Sarawak.
“Aum mega mekuhka pengawa nambahka penyikar penyangkai kapal ti nyadi komponen besai dikena meransang penyikar global,” tandu iya.
Rambau program nemuai nya, Tuai Direktor Biro Penyangkai Kapal enggau Penyangkai Kapal Opis Menteri Tanah, Infrastruktur sereta Dagang Temuai (MLIT) Jipun Inada Mashiro bisi bekunsika pasal sejarah penyangkai kapal Jipun sereta kuing tuju polisi sida.
Iya madahka Jipun ngembuan lebih 1,000 penyangkai kapal, ke alai 10 penyangkai kapal nya ba baruh kategori nyadi Penyangkai Kapal Strategik Pukal Antarabansa, seraya dia penyangkai kapal nyadi Hab Kontena Antarabansa enggau 100 nyadi penyangkai kapal besai.
Uggah enggau deligit iya mega bisi dibai nemuai ngagai siti ari 10 Penyangkai Kapal Strategik Pukal Antarabansa di Onahama.
Dalam program nemuai seraya gawa nya, Uggah disempulang dua iku sapit menteri iya, Dato Majang Renggi enggau Ir. Aidel Lariwoo. – TVS
