KALAKA, 31 Julai: Pengerami Regata kalaka 2023 sepengelama tiga hari berunggu ba sungai krian nerima timbal ke kchukup manah ari mensia mayuh.
Beduduk ari nya, Kaban Kunsil Nengeri (ADUN) Kalaka, Mohd Duri madah diri tepantup ati enggau tusun pengerami Regata Kalaka 2023 taja keterubah iya diatur lalu ngarapka opis menteri bekaul ulih meri agih belanja ke lebih besai awakka mayuh agi aktiviti ulih diatur nyerumba pengerami nya dudi hari.
“Aku ngasaika taja pan agi baru nyadi pengari rayat (ADUN Kalaka) lalu ngatur pengerami tu ungkup keterubah iya lalu aku deka meri terima kasih kaban pengawa tu enda ngelebu,” ku iya.
Mohd Duri madah munyi nya lebuh dirandau TVS pengudah tembu pengawa nangguhka pengerami Regata Kalaka 2023 ba Tebing Sungai Krian, ditu kemari.
Berebak enggau nya, Mohd Duri ke mega penyanding penemu Regata Kalaka 2023 ngarapka opis bekaul baka opis menteri dagang temuai enggau seni kreatif ulih meri agih belanja ke lebih besai awakka mayuh agi aktiviti ke ulih diatur ke pemaik mensia mayuh dudi hari.
“Pengerami serak tu kitai udah nambah sekeda achara enggau kitai meri perais nyentuk lumur empat enggau lumur lima.
“Nyadi tu kebendar begunaka kos ke besai lebih kurang dalam RM9,200 ungkup perais mata duit.
“Nya alai, aku ngarap NGO, Opis Menteri Dagang Temuai, Seni Kreatif enggau Pemerindang sereta Opis Premier ulih mantu kitai ungkup program taun baru ngambika kitai mega ulih nambahka mayuh agi achara ngenyit baka Marathon, achara khas ungkup rumah panjai enggau kitai ngatur keterubah iya perau berias,” ku iya
Sama bisi datai Pegawai Pelilih (D.O) Saratok, Haron Mahidi Pegawai Khas Sapit Menteri Besai, Leonard Jambu, Sekretari Politik ba Opis Premier Sarawak Bell Benard Aggan enggau ke bukai.-TVS
