SHAH ALAM, 30 Julai: Menteri Besai Datuk Seri Anwar Ibrahim meri jamin Perintah Penyerakup asil gempung ari 19 parti jam ke diatu kering, tegap sereta tusah deka tumbang.
Iya ke mega Chairman Pakatan Harapan (PH) madah maya pun numbuhka perintah bulan November suba, runding sepenemu entara semua ketuai nyengkaum raban Menteri ke diatu betambah tegap sereta tusah deka dikeruga.
“Kitai kering bala menyadi, enda ibuh ngandal deka nukar (perintah) laban nya ngenusahka pengandal kita lebih agi kitai dalam Pakatan Harapan (udah tegap).
“Aku ngiring menua berengkah bulan November. Nyadi tuai PAS madah tiga bulan aja.
“Kitai pan nyaut baka ni nya, taja pan kitai andal tang dini iya nemu nih.
“Pengudah tiga bulan, bulan Mei ditangkan puasa enda ga mujur. Udah nya, Hari Raya enda ga nyadi.
“Ngujungka ba aum Parlimen ti deka datai aku madah bai mosyen enti PAS, BERSATU bisi undi (majoriti) bai mosyen laban kitai endang nadai nagang,”ku iya.
Anwar madah munyi nya maya pengawa Licha Arus Mirah Kuning nyerumba Pengawa Bepilih Besai Nengeri (PRN) Selangor ba Subang Bestari lebuh Hari Enam.
Tandu iya, penegap perintah diatu asil sukung enggau runding sepenemu ari dua Sapit iya, Datuk Seri Dr Ahmad Zahid Hamidi enggau Datuk Seri Fadillah Yusof ti nyemetak madahka sukung penuh ngagai perintah.
Penegap perintah dibaruh iring iya mega betambah kering nengah komitmen besai dipandangka bala tuai parti sekalika nya PH, Barisan Nasional (BN), Gabungan Parti Sarawak (GPS), Gabungan Rakyat Sabah (GRS), Warisan sereta semua parti dalam gempung Perintah Penyerakup.-TVS
