PAKAN, 29 Julai: Siku orang tuai asal ari Rumah Layang Ulu Nunggang ditu diripotka lenyau pengudah nurun ngupa pantu kenyau ari pagi kemari.
Nitihka penerang, tudah ke lenyau iya nya Ajai anak Dana, 69 nadai pulai ke rumah pengudah iya nurun ngupa pantu ba kandang babas enda jauh ari rumah panjai sida.
Beduduk ari nya, anak iya udah ngaga ripot ba Balai Polis Julau ngambika raban ke bekaul ulih mantu bejalaika pengawa nyidi enggau ngesah (SAR) penusah nya.
Naka tu bisi lima iku kaban ari Balai Bomba enggau Penyah Penusah (BBP) Bintangor betuaika PBK II Kilok Lampas enggau empat iku kaban polis sereta empat iku Raban Penyaga Orang Periman (APM) disaup urung 50 iku peranak rumah panjai udah berengkah bejalaika pengawa nyidi tudah ke lenyau.-TVS
