BETONG, 29 Julai: Sapit Menteri Nembiak, Lumba enggau Main sereta Pedagang Sarawak, Dato Gerald Rentap Jabu madah Pasar Tani Medan Betong dikearap ulih nyadi siti agi pelasar ngagai raban pedaja mit ba pelilih tu ngerichahka agi sosio ekonomi sida.
Ku iya, tu berindik ari sukung sereta timbal ke manah ari raban pedaja enggau orang dagang kenyau hari keterubah Pasar Tani Betong dilancharka.
“Malam tu kitai meda bisi lebih 90 iku pedaja ba Pasar Tani bisi ngambi bagi ba bansal ke disedia raban FAMA (Kaunsil Makit Betanam Betupi Perintah Besai) Sarawak.
“Kelimpah ari nya, peranak lokal ditu mega bisi mai asil barang ke dijual ukai semina sida ari Betong tang mega sida ari Pusa, Debak nyentuk ari Kuching pan bisi datai.
“Tu siti ari pengawa dikena nyungkak penatai pemisi peranak ditu enggau komuniti ke bedagang lalu arapka pengawa baka tu ulih diatur baru dudi hari,” ku iya.
Rentap ke mega Kaban Kunsil Nengeri (ADUN) Layar ngarapka raban pedaja ulih bepikir sechara inovatif sereta enda bejualka produk ke sebaka enggau pangan diri.
“Kitai deka meda ukai semina sebengkah produk aja dijual ditu.
“Pedaja ke bisi ngambi bagi patut ngembuan runding ke inovatif, bebida pemakai dijual baka bisi nya bejual manuk guntin, sutung, kambing panggang enggau ke bukai laban tu ulih nyendiaka mayuh pilih ngagai orang ke datai,” ku iya maya dirandau TVS pengudah bejadika Pasar Tani Betong ba Dataran Medan ditu, empai lama.
Nya alai, Rentap madah iya enggau Kaban Parlimen Betong Dr Richard Rapu deka bebendar agi nyendiaka pelasar tauka program dikena nyungkak ekonomi rayat kelimpah neruska kerejasama enggau pengatur program baka FAMA ba maya dudi.
Ungkup penerang, Pasar Tani Medan Betong deka dibuka ninting Hari Empat nyentuk Hari Enam ninting minggu berengkah ari Pukul 4.00 lemai nyentuk ke Pukul 10.00 malam.
Sama bisi datai, Kaban Parlimen Betong Dr Richard Rapu, Sekretari Kaunsil Pelilih Betong Charlie Keling, Direktor FAMA Sarawak Ramli Mat Sani enggau ke bukai. -TVS
