KUCHING, 28 Julai: Sarawak ngembuan pelin, polisi enggau program ke benung dilanggur sereta dipejalaika dalam ngetanka pemeruan rampa menua enggau deka nyerungkai kuasa beresi tauka gadung.
Direktor Kanan, Palan Instrumentasi Meteorologi Enggau Sains Atmosfera, Opis Meteorologi Malaysia Ambun Dindang madahka pemujur nya mandangka Sarawak dulu nyingkang ari nengeri bukai di Malaysia menatika empas ubah klimet ke ngasuh pengangat dunya nyadi.
“Aku temegah laban Sarawak diatu udah mupuk nguna kuasa gadung baka hidrogen enggau solar. Kedua-dua kuasa tu ulih dikemaru sereta ulih mantu ngurangka pemansut gis rumah gadung ti meri empas ke enda manah ngagai angin sereta rampa menua,” ku iya madah rambau ditelefon pengarang berita TVS.
Kenu ku Ambun insiatif ti dipejalaika perintah Sarawak nya mesti disukung semua ejensi sekalika perintah tauka peribit nyengkaum rayat ngambika pemanah ari kuasa beresi nya ulih dikemujurka.
“Kelimpah ari kuasa hidrogen enggau solar, angin mega kuasa ti ulih dikemaru. Nya alai manah amat perintah Sarawak ngemeratka guna kuasa gadung tu lebih agi ngasilka kuasa karan,” tandu iya.
Ambika chunto Sarawak udah bisi kerita enggau bas ke nguna kuasa hidrogen sereta enda lama agi deka datai Autonomous Rapid Transit (ART).
Kelimpah ari nya, Sarawak diatu mega benung ngemansangka industri dagang karbon ti dipeda mantu ngurangka pemansut karbon.
Nya entara polisi perintah ti menatika pemeruan rampa menua ke agi gadung ba nengeri tu seraya ransing bejalaika kimpin nanam pun kayu di serata nengeri.
Nitihka rikod, Sapit Premier Sarawak Dato Sri Dr Sim Kui Hian madahka Sarawak deka nganjung eksport 1.5 juta tan hidrogen ke Korea Selatan dalam taun 2027 dikena mantu nangkup peminta menua nya sereta dijangka nambahka bekal nyentuk tiga juta tan taun 2030.
Beduduk enggau nya, perintah Sarawak udah bejalaika chara ke proaktif nanggam kerejasama enggau pemekuh industri di Korea Selatan nyerangkung nyain sekeda Memorandum Pemereti Ati (MoU) ke bekaul. – TVS
