KUALA LUMPUR, 28 Julai: Pengawa Opis Menteri Pengerai Malaysia (KKM) ti deka ngemanah 436 klinik repuk ba serata menua nengah Program Bintara Madani chukup beguna dikena nentuka pemujur program nya dudi hari.
Sapit Menteri Pengerai, Lukanisman Awang Sauni madah, nyema proses nya ulih diputarka ujung taun tu, pengawa ngemanahka sekula repuk nya tentu ulih dirumban ba taun dudi.
“Agih belanja ungkup taun tu bisi RM111 juta, lalu RM100 juta endang ungkup ari Program Bintara Madani enggau RM11 juta agi ungkup program ngemanah ke udah bisi endang deka dipejalaika.
“Kitai chukup andal pejalai ngaga klinik repuk tu, kitai ulih ngerumban awak enggau timpuh ke udah diletak Kaunsil Respon Malaysia Madani lalu kena Disember 2023 kitai deka mutarka penanggul-penanggul klinik repuk ba 436 klinik,” ku iya.
Lukanisman ke mega Kaban Parlimen Sibuti madah munyi nya maya dirandau ba program Ruang Bicara ke diberi pejuluk ‘Membangun Klinik Daif, Memacu Perkhidmatan Efektif’ dipancharka Bernama TV malam ensana.
Nangkan ke nya, iya mega madahka program nya deka dipejalaika berenggat.
“Pemujur 2023 chukup begunan ngagai KKM dikena meri pengandal ngagai PM (Menteri Besai) nambahka agi belanja dikena ngemanah klinik repuk awakka kitai ulih ngelengkas agi penyampau teda ke bisi ungkup taun 2024 enggau 2025,” ku tandu iya.
Nerang silik, Lukanisman madah sesebengkah klinik nya dikategorika repuk nyema iya ngudan tiga pekara besai iya nya udah beumur lebih 50 taun enggau diperati rusak ari sukut struktur, kurang utiliti baka wayar enggau entali paip tauka kurang ari sukut pengelikun.
Bebida enggau klinik ba menua pesisir selalu iya disebut repuk laban langkar udah rusak, iya mega madah klinik ba mengeri betapi enggau penyampau pesakit ke chukup mayuh nyentuk meri empas ngagai kualiti servis ke disedia.
“Klinik repuk mega nyadi ba mengeri besai baka ba Kuala Lumpur.
“Kitai bisi 1040 buah klinik ke agi ngena kayu tauka setengan kayu. Nya endang automatik (dikumbai) klinik repuk.
“Enti kitai berati ari sukut konteks menua pesisir enggau mengeri, repuk ba menua pesisir kebendar langkar kayu tauka setengan kayu ke patut ditukar tauka dikemanah ketegal bisi bumbus tauka rusak.
“Tang ba mengeri taja klinik dipeda manah, kitai betapi enggau penyampau pesakit ti kelalu mayuh,” ku iya.
Dulu ari tu, Menteri Pengerai, Dr Zaliha Mustafa madah, naka tu bisi 1,200 klinik pengerai ke ba kategori repuk enggau nadai ulih guna lebih agi udah manggai umur 50 taun udah dikelala ba selampur menua. -TVS
