SARATOK, 27 Julai: Raban orang bumai lebih agi ke diau ba sitak Kalaka dilalau patut nguna kreativiti diri ngereja pengawa ngambika komoditi ke ditanam sida ulih mansutka asil ti ngemantup ati.
Kaban Kunsil Nengeri (ADUN) Kalaka Mohd Duri madah ari pengelandik nya dia penatai pemisi raban orang bumai tentu deka nambah.
“Reti nya, laban kitai di Sarawak ngembuan tanah ti ami lalu bepangai ba penau pengelandik diri.
“Kelimpah bisi ati deka nguji enggau naka ulih genap pengawa dikereja kitai empu dikena nambah ke asil utai tanam,” ku iya.
Mohd Duri madah munyi nya lebuh bejadika Aum Besai Ninting Taun (AGM) Opis Orang Bumai Sitak (PPK) Kalaka ke-39 Taun 2023 ba Rumah Dayak Saratok ditu, kemari.
Nangkan nya ku Mohd Duri, raban orang bumai mega patut nemu chara bulih bantu ari perintah.
“Kitai di Sarawak ditu bisi disediaka bemacham bantu. Nya alai, rayat mesti rajin betanya dini alai minta bantu sekalika nengah gerempung dikena ngemudahka bantu diberi.
“Pekara ke pemadu beguna iya nya (pengawa betanam komoditi nya) ulih meri penguntung ngagai sida,” ku iya.
Sama bisi datai Penulung Pegawai Betanam Betupi Ari Begian Intitusyen Betanam Betupi, Opis Betanam Betupi Sarawak Insol Dempi enggau Jeffry Mengga.
Ngelansa pasal Pekit Perau Berias ke deka diatur beserimbai enggau Regata Kalaka 2023 Mohd Duri madah, naka tu bisi 10 tim udah nganjung nama masuk pekit nya.
Ungkup rikod, Regata Kalaka 2023 bisi nyendiaka perais mata duit sepenyampau RM15,000 ungkup gelar Raja Sungai diatur berengkah 28 nyentuk 30 Julai tu.
Udah nya, malam ke penudi kena 30 Julai dia mensia mayuh deka diperindang siku penanyi ari Semenanjung, Haqiem Rusli.-TVS
