BETONG, 25 Julai: Sapit Premier Sarawak Datuk Amar Douglas Uggah Embas madah sekor dagang karbon diperambu deka dikemansang ngaul Tanah Adat Bansa Asal (NCR) di nengeri tu.
Ku iya, pekara nya diasai nyelai laban enda kala dikereja tang nya mih sebengkah inisiatif ekonomi baru deka dikemansangka perintah nengeri lalu dikeandal tau ngasilka penatai pemisi ngagai peranak rumah panjai lebih agi raban pengempu tanah NCR dudi hari.
“Aku sebedau tu bisi berandau enggau sida ari Opis Sarawak Forestry (SFC) laban kita pan tentu bisi ninga ba TV kemari Premier Sarawak bisi nyebut pasal dagang karbon.
“Nya mih ti dikerandau aku enggau SFC laban sektor tu deka muka peluang ngagai rayat menua tu nambahka penatai pemisi ari dagang dagang karbon.
“Baka ba menua kitai pun kayu ke endang nadai kala ditebang ba kampung jerung din kebendar ngembuan kuasa karbon ke ulih dijual lalu tau ngasilka penatai pemisi,”ku iya.
Uggah ke mega Kaban Kunsil Nengeri (ADUN) Bukit Saban madah munyi nya rambau Program Randau Pengempu Tanah Adat Bansa Asal (NCR) ba Rumah Mendit Unsu Penom Ulu Paku ditu, empai lama.
Ku terang iya pun kayu kebendar ulih nyimpan karbon dioksida dalam juluk ngurangka empas ubah klimate enggau tikas pengangat global.
Berindik ari nya, iya deka ngatur aum baru enggau SFC ngambika ulih nerang enggau lebih silik pasal dagang karbon ngaul tanah NCR.
“Nyadi nya mih dikumbai kitai ekonomi baru, chukup nyelai ba kitai Iban.
“Enti nitih kayu nya endang ungkup ditebang tang tu pun kayu enda tau ditebang ngapa awak ke nya ulih ngasilka (karbon) tau dijual kitai nya ila lalu deka bisi orang datai nerang madah ngagai kitai chara ngemansangka dagang (karbon) tu,” ku iya.
Berindik ari nya, Uggah meransang perayat ke diau ba rumah panjai anang enda nemu bagi adan temuda enggau pangan diri berengkah ari diatu laban tanah nya deka disukat nengah inisiatif nyukat tanah NCR enda lama agi.-TVS
