SARATOK, 23 Julai: Tuju perintah ngatur sesebengkah program ukai semina dikena beperindang tang ngembuan mayuh perampa pemaik ngagai mensia mayuh.
Kaban Kunsil Nengeri (ADUN) Kalaka Mohd Duri madah, ambika banding baka Pesta Saratok kebendar diatur ngambika bisi endur raban pedagang ngelakuka produk pemakai lokal kelimpah dikena ngelala bakat ke dikembuan peranak Saratok.
“Tuju perintah ngatur sesebengkah program baka Pesta Saratok ukai semina dikena beperindang tang ngembuan tuju ke besai agi ari nya.
“Kelimpah nempa Saratok nyadi pelilih dikerinduka bala temuai, program nya mega meri peluang ngagai mensia mayuh nyungkak penatai pemisi.
“Udah nya ulih dikena raban pedagang ngelaku produk lokal ke bisi di Saratok baka produk krafjari sereta pemakai ke bisi ba Saratok,” ku iya.
Mohd Duri madah munyi nya maya bejadika Pesta Saratok ba Panggau Besai Dataran Sri Kalaka ke digulu urung 3000 iku mensia, apin lama.
Sama bisi datai Kaban Kunsil Nengeri (ADUN) Krian, Friday Belik, ADUN Kabong, Mohd Che Kadir, Seketari Politik Premier Sarawak, Bell Benard Aggan, Pegawai Pelilih Saratok, Haron Mahidi, Sapit Residen Betong, Mahra Salleh enggau ke bukai.
Nangkan ke nya, Mohd Duri madah Pesta Saratok ulh nyadi pelasar ngiga bakat anak Saratok nengah bemacham pekit ke bisi diatur kelimpah dikena ngedutka kaul semua bansa enda ngira renggat umur.
“Pesta Saratok mega dikena ngelala bakat dikembuan anak Saratok nengah pekit ke bisi diatur seraya dikena ngempuruka mensia mayuh ari bemacham renggat umur enggau bansa,” ku tandu iya.
Ungkup penemu, Pesta Saratok diatur sepengelama sebulan berengkah 1 Julai nyentuk 30 Julai tu ditangkan pengerami Regata Saratok deka diatur kena 28 nyentuk 30 Julai tu.-TVS
