KUCHING, 22 Julai: Raban veteran Soldadu Malaysia (ATM) ti udah pinchin patut diberi perati enggau diberi peluang karier kedua dikena nyamin pengelantang sida.
Panglima Medan Timur Soldadu Darat, Leftenan Jeneral (B) Datuk Stephen Mundaw madahka, tebal agi soldadu ke udah pinchin agi regas sereta bepenau laban ngembuan mayuh latih pengelandik sepemanjai dalam timpuh bejalaika servis nyadi soldadu ti ulih nangkup sebarang pangku pengawa ke bisi kemaya hari tu.
Ba awak ke sama, karier kedua beguna bagi sida neruska pengidup pengudah bepinchin seraya nyeliahka ari labuh nyadi entara raban kurang bepenatai pemisi (B40).
“Pengudah pinchin ari soldadu, sida begunaka peluang karier kedua, tu mih pekara ke ditegika kitai.
“Sida agi ulih mantu ba pemansang menua laban dilatih chukup ari mayuh macham pengelandik baka mekanik, komunikasyen, injiniering elektrikal enggau ke bukai,” ku iya.
Iya mansutka jaku nya rambau dirandau pemberita TVS di begunan Suara Sarawak.
Ku Stephen, bisi sekeda raban veteran iya nya ba baruh kategori B40 ti semina bepanggai ngagai duit pinchin lebih kurang RM1500 dikena neruska pengidup napi kos pengidup ke majak tinggi maya diatu.
“Sida (veteran) diau ba rumah ke enda tentu manah, atap rusak enda ulih diseruri lalu bisi ke ngenduh ba rumah orang. Tu mih realiti pengidup veteran kitai.
“Bisi sekeda ke nerima duit pinchin RM1000 lebih aja. Baka ni nuan ka neruska pengidup laban sida pinchin tu maya umur 45 taun enggau 40 taun lalu maya tu mih anak sida ke sekula,” ku iya nerang.
Berindik ari nya, Stephen ngembuan pengarap ke besai ngagai perintah enggau ejensi peribit ulih bekerejasama nyendiaka peluang gawa ungkup raban veteran di menua tu.
Ku iya madah, endang tanggungpengawa iya dalam negika hak raban veteran ATM ti bepegai teguh enggau semangat bekaban dalam nempuh penguji sereta berabun nyawa nyaga pengelikun menua ti diasai rayat diatu.
“ Aku ngasaika diri nyadi komander sida, taja udah bepinchin aku seruran ingat bala bakih aku, orang ti begulai enggau aku berambun nyawa, belatih enggau nempuh penguji.
“ Taja sida udah dikuburka, tang semangat veteran agi bisi, kami nyaga sama diri taja udah nadai agi mih kami nunu lilin ke sida, Nya mih tanda semangat kaban enggau semangat kami bejalaika servis dalam soldadu,” ku iya.
Bepelasarka rikod, Datuk Stephen Mundaw iya nya siku anak iban keterubah nempa sejarah nyapai status Jeneral Tiga Bintang dalam Raban Soldadu Malaysia (ATM).-TVS
