TELANG USAN, 21 Julai: Kaban Kunsil Nengeri (ADUN) Telang Usan, Dennis Ngau ngarapka rayat ba sitak nya terus meri kerejasama sereta nyukung Perintah Sarawak dibaruh iring Gabungan Parti Sarawak (GPS) awakka perambu pemansang terus dikemujur.
Iya madahka bemacham projek rayat benung dipejalaika ba baruh Ejensi Pemansang Tanah Tinggi (HDA), Opis Kereja Raya (JKR) sereta ke bukai.
“Tu mih sebagi ari program pemansang fizikal, ekonomi, pelajar ba DUN Telang Usan.
“Semua projek tu diteruska, seruran bisi nyengkaum projek infra ba baruh HDA, JKR, konsesyen kampung, enggau bukai.
“Ari JBLAB, Telco, sereta ke bukai. Baka ke dipadahka aku bida pemansang tu nyata dipeda ti dibanding dalam taun 2011 (suba),”ku iya.
Dennis madah munyi nya ngagai TVS lebuh dipinta bekunsika pasal pemansang ti udah enggau deka dipejalaika ba sitak DUN Telang Usan, apin lama.
Nangkan ke nya, Dennis madah diatu nadai siku orang ulih madah senentang Telang Usan nadai pemansang.
‘Nyadi aku beterima kasih ngagai perayat di Telang Usan ti seruran nyukung aku sereta perintah GPS.
“Bekau ari sukung sida nya ngemuntangka aku ngatur perambu pemansang ti dirandaka rayat terus ngagai YAB Premier Sarawak Datuk Patinggi Tan Sri Abang Johari Tun Openg.
“Enti nadai kerejasama ari rayat tentu pekara (pemansang) tu tusah deka dikemujur,” ku iya.-TVS
