PUSA, 20 Julai: Sepenyampau RM23, 650 bantu tumu udah diberi ngagai ngagai pengempu tauka tuai bilik (KIR) ari empat belas buah rumah ke balat tebunsa ketegal dipangka biau balai di Kampang Ulu Beladin, kemari.
Kaban Kunsil Nengeri (ADUN) Beting Maro, Razaili Gapor madah, bantu ari Opis Pengintu Pengelantang Mensia Mayuh (JKM) nya nyengkaum bantu ari sukut kereban dikena ngaga rumah baru sepenyampau RM22,250 enggau bantu barang pemakai rangkai beungkur RM1400.
“Nitihka Opis Pengelikun Mensia Mayuh sida deka nyuaka bantu mata duit ngagai sida ke patut manggai RM2,500.
“Ungkup kereban ngaga rumah enggau iya ke bukai dalam bentuk barang pemakai rangkai. Semua dipegulai sekali enggau bantu kereban berumah aja bisi RM22,250.
“Semua dipegulai sekali penyampau iya RM23, 650,”ku iya.
Taja pia ku Razaili, penyampau bantu nya deka diserenih baru sepengudah pansik silik tembu dipejalaika jemah lebih agi ungkup sida ke bela tebunsa ketegal biau balai nya.
“Kitai nerima ripot urung 50 buah rumah bisi kena pangka biau balai bisi nya nyengkaum rumah ke runtuh abis.
“Asil ari pengawa ngabas ke dipejalaika sehari tu kitai udah minta sida ari Opis Pengelikun Mensia Mayuh (JKM) beratika baru penyampau rumah ti dituntung penusah.
“Tu beduduk ari bisi sekeda enda masuk dalam rintai penerima bantu, lebih agi sida ke baru direjista bisi 14 buah rumah iyaka pemadu balat udah bisi bantu.
“Udah nya, urung 30 buah agi apin dirikod enggau deka dituku ngambika sida bela nerima bantu ke patut,”ku iya.
Ungkup penemu, penusah biau balai ke nyadi di Kampung Ulu Beladin kena 15 Julai tu tadi entara penusah biau balai ke pemadu besai ditapi peranak menua nya.
Sama bisi datai Kaban Parlimen Batang Lupar Mohamad Shafizan Kepli, Pemangku Pegawai Pelilih Mit Pusa, Bujang Ladi, bala tuai raban bansa besemak enggau ke bukai.-TVS
