KUCHING, 20 Julai: Pengawa besilih ngempu Servis Penerebai Menua Pesisir (RAS) ari Perintah Besai deka mantu nyungkak pemansang ekonomi Sarawak.
Premier Sarawak Datuk Patinggi Tan Sri Abang Johari Tun Openg madahka servis nya bedau temu sekalika meri penguntung tauka pengerugi ngagai Sarawak, tang iya pechaya perintah nengeri tau bulih penguntung ari sektor bukai.
Kenu ku iya pemisi servis penerebai nya bisi daya penatai komuniti dagang enggau pemeranak puku ari menua luar lebih agi menua Korea enggau Jipun.
“Pekara ti kedua, Sarawak bisi pengelebih laban baka ke ditemu kitai bisi kuasa ulih dikemaru, pemeranak puku datai ke nengeri tu.
“ Nya alai mesti bisi servis penerebai bilun ari menua asal sida meranakka puku ba Sarawak sereta nyendiaka peluang gawa ngagai rayat Sarawak,” ku iya madah pengudah tembu Pengawa Nyain Sempekat Pemereti Ati (MOU) Besilih Ngambi Servis Penerebai Menua Pesisir tauka Rural Air Services (RAS) entara perintah Sarawak enggau Perintah Besai, sehari tu tadi.
Nya alai, Abang Johari nerangka pemisi servis penerebai tu endang beguna amat dikena matak pemeranak puku sereta mantu ngeranchakka sektor dagang temuai ba nengeri tu.
“Sarawak bisi Strategi Pemansang Pasca COVID-19 (PCDS) 2030, kitai deka ngeluarka Minyak Injin Bilun ke Meruan (SAF) ti ulih dikunsi kitai enggau serikat penerebai bilun ti diasilka ari lukut.
“Nitihka analisis, endur ke ngembuan pemesai 1,000 ikar ulih ngeluarka SAF 20,000 tong sehari. Nyadi tu siti agi pengawa ba renggat perintah Sarawak ti ulih dikena serikat penerebai bilun,” ku terang iya.
Nangkan ke nya, iya madahka serikat penerebai bilun ti diperambu diambi perintah sarawak iya nya serikat penerebai ti meruan ke nguna input ti enda ngeruga pemeruan rampa menua. – TVS
