BETONG, 17 Julai: Pangka biau balai ngujungka urung 24 buah rumah di Kampung Ulu Beladin ditu balat rusak.
Penusah biau balai nya berengkah nyadi urung pukul 8.30 malam Hari Enam tu tadi dipadahka entara biau balai ke pemadu besai ditapi peranak menua nya dalam kandang 40 taun ke udah.
Siku pengari Kampung Ulu Beladin Haji Mostapha Sili madah lebuh penusah nya nyadi iya enggau sida sebilik benung belelak dalam rumah.
“Lebuh penusah tu nyadi kami baru udah tembu sembiang Isyak, tekenyit ninga munyi utai baka munyi pun kayu bisi tumbang udah nya aku lalu pansut ari rumah.
“Dia aku meda dua buah rumah ba mua rumah kami udah runtuh, utai nyadi kelalu jampat kira dalam 20 sikin aja angin mangka dua buah rumah ngujungka perabung rumah besemak pan sama tebabak lalu terebai,” ku iya.
Tandu apin kala seumur idup iya meda biau balai mangka rumah sida ngemalat nya.
“Tu mih iya ke pemadu besai dipeda aku naka ke diatu. Penyampau rumah ke rusak bisi 24 buah lalu iya runtuh abis bisi tiga buah tang nasip bendar rumah apin alai orang diau.
“Enti enda pia tentu bisi orang bebadi nyawa ketegal biau balai nya,” ku iya maya dirandau TVS ba semak rumah sida ke dipangka biau balai ditu, kemari.
Udah nya siku ari pengempu rumah ke dipangka biau balai, Suhaili Atok beumur 74 taun madah iya berasai benasit laban semina bakal mimit ba pala, jari enggau kaki ditebak kerimpak cheremin mua empelua rumah iya ke pechah maya penusah nyadi.
“Tu biau balai ke pemadu besai naka ke diatu. Umur aku diatu udah 74, baru iya meda utai ngemalat nya.
“Sebedau tu kala nyadi tang enda baka ke nyadi tu baka biasa aja aku berengkah nguan genturung pendiau tu kenyau ari taun 1976.
“Maya penusah tu nyadi aku benung tinduk semak mua empelua nya alai cheremin nya pechah lalu engketik kena aku,” ku iya.
Penusah ke nyadi ba Kampung Ulu Beladin nya udah disah raban ari Balai Bomba enggau Penyah Penusah Saratok.
Naka tu peranak Kampung Ulu Beladin ke tebunsa ketegal biau balai nya benung ngenduh ba rumah kaban belayan sida. Nadai penusah bebadi nyawa tauka raya bakal bekau ari penusah nya.-TVS
