KUCHING, 16 Julai: Gabungan Parti Sarawak (GPS) udah ngaga pemutus ngemendar sempekat kerejasama (MoU) entara Parti Demokratik Progresif (PDP) enggau Parti Sarawak Bersatu (PSB) bepelasarka niat ti manah.
Chairman GPS, Datuk Patinggi Tan Sri Abang Johari Tun Openg taja pia iya madah kerejasama nya enda mutuska sekalika PSB nyadi sebagi ari komponen GPS.
“Nyema niat sida manah, kitai nerima (setuju) sida neruska kerejasama nya. Taja pia, PSB agi ukai kaban komponen GPS, nya mih penemu kami,” ku iya maya aum pemberita pengudah betuaika Aum Supreme Kaunsil GPS di BCCK, malam tadi.
Nangkan ke nya, Abang Johari nandu penerang madahka GPS ngemeratka penegap enggau penyerakup sereta deka nempa Sarawak tebilang enggau pengelantang.
Ngelansa pekara bukai, Premier Sarawak madah GPS enda nganjung raban komiti mantu Pengawa Bepilih Besai Nengeri (PRN) ba enam nengeri di Semenanjung Malaysia ti deka diatur kena 12 Ogos tu ila.
Taja pia ku iya, GPS laban ke nyadi kaban komponen parti dalam Perintah Penyerakup deka bejalaika tanggungpengawa nyukung bakih parti ti bediri minta pilih ba Kedah, Kelantan, Terengganu, Selangor, Negeri Sembilan enggau Pulau Pinang.
Ku iya, GPS deka diarika lima menteri enggau tujuh sapit menteri ba renggat Perintah Besai sedia nyukung enggau mantu chalun parti komponen ke bediri minta pilih.
“Nya mih tanggungpengawa kami ke nyadi komponen parti,” ku terang iya nyemetak.-TVS
