KUCHING, 16 Julai: Kemaya hari tu agi tubah rebak baru ti rindu ke main asal bansa Dayak, ku Mabong Unggang.
Tuai Akademi Serakup Dayak Iban Sarawak (ASADIA) nya madah pekara tu berupai dipeda nengah tiga bengkah kelas Ngajat ti bisi dibuka sida dalam bulan tu.
“Ambi banding ba Kelas Datun Julud (Orang Ulu) ti diatur ba Palan Main Asal ASADIA di Kota Sentosa Kuching, bisi 22 iku raban indu ngerejister diri masuk kelas nya lalu diajar siku orang ke tebangkar ba main asal Dayak iya nya Ngo Hawing.
“Dalam bulan tu mega ASADIA bisi muka kelas Ajat indu enggau lelaki Iban diatur ba Balai Raya Chinese Moral Uplifting Society di Siburan.
“Kelas nya diperati nerima sambut ti chukup manah iya nya bisi 58 iku nembiak bisi ngambi bagi ba Kelas Ajat ti diajar Ericsson Johny enggau Sharia Xania,” ku iya seraya madah semua sida nya datai Genturung Pendiau di Siburan.
Iya madah munyi nya ngagai TVS nengah sebengkah penerang, sehari tu tadi.
Berebak enggau nya, Mabong madah ba pengeran ati ASADIA deka ngangkat sereta ngerembai ke main asal Dayak dia kerejasama ari bala tuai genturung pendiau baka Penghulu enggau Tuai Rumah chukup beguna.
Nya alai, iya meri besai terima kasih ngagai Penghulu Muahari ari Batu Gong laban udah bebendar ngatur palan ngambi bisi endur ASADIA muka kelas main asal.
“Pia mega terima kasih ngagai Tuai Rumah Payr Nuga ari Sungai Turong laban udah ngerah raban nembiak iya sama enggau belajar ke main asal.
“Arapka mayuh agi tuai Dayak ngembuan penyiru enggau pengeransing besukung ngangkat sereta ngerembaika main asal Dayak,” ku iya.-TVS
