BETONG, 15 Julai: Agih belanja sepenyampau RM90,000 udah dikemendar dikena ngaga palan penyembui lada burak solar ba Rumah Kelimbang Jaman, Penyuluk di Ulu Layar ditu.
Kaban Parlimen Betong Dr Richard Rapu madah, penembu projek kerejasama entara Universiti Sains Malaysia (USM) Pulau Pinang enggau Unit Pematak Agenda Bumiputera (TERAJU) nya disadang tembu dalam timpuh tiga bulan.
“Pagi tu aku datai ngagai Rumah Kelimbang Penyuluk Ulu Layar lalu nyerahka siti projek ke udah dikemendar iya nya projek ngaga rumah endur sida iya ngerangkai lalu memproses lada burak.
“Projek tu program TERAJU iya nya ari Opis Menteri Besai begulai enggau bakih strategik Universiti Sains Malaysia dikena negapka ekonomi raban B40,” ku iya seraya madah projek nya disadang tembu dalam timpuh tiga bulan.
Dr Richard nerangka pekara nya ngagai TVS sepengudah meresa lalu nyerah taba Projek Ngaga Palan Penyembui Lada Burak Solar di Penyuluk Ulu Layar ditu, ensana.
Nangkan ke nya, Dr Richard madah semua pekebun lada ba Rumah Kelimbang, Penyuluk ke ngundan 32 pintu deka diberi latih nengah iring raban ari USM.
“Arapka penembu projek nya jemah ulih nyungkak asil lada burak ba rumah panjai ditu enggau genturung pendiau ke besemak.
“Pia mega, program tu chukup manah ngambika chara sida ngintu lada lebih jampat sereta mansutka asil ke lebih bekualiti awakka menua tu (Betong) ulih dikelala ba seraya dunya,” ku iya.
Berebak enggau nya, Dr Richard arapka projek kerejasama USM enggau TERAJU nya ulih dikerembaika ngagai rumah panjai bukai di Betong.-TVS
