BETONG, 15 Julai: Produk lada ari menua Betong nerima peminta tinggi ba makit menua luar laban ngembuan kualiti bekelas dunya.
Tuai Program Agih Pemansang Orang Dagang Bumiputera (DUPB) 2019 Sarawak, Syed Yusof Syed Kechik madah kualiti lada ari Betong endang digiga makit ari luar laban ngembuan standard ti dikedeka dunya.
“Kebendar produk ari Betong tu ngembuan kualiti lada ke endang digiga dunya.
“Nyadi kami ngasaika rugi enti enda ngambi peluang tu enti enda diguna enggau manah.
“Nya alai, aku berasai gagit maya (Kaban Parlimen Betong) Dr Richard Rapu deka begulai enggau kami sereta raban TERAJU ngemansangka agi produk-produk ari rumah panjai ngagai tikas entarabansa,” ku iya.
Syed Yusof mansutka pekara nya pengudah pengawa meresa lalu nyerah taba Projek Ngaga Palan Penyembui Lada Burak Solar ba Rumah Kelimbang Jaman di Penyuluk Ulu Layar ditu, ensana.
Sama bisi datai nyereta pejalai ngelawa palan projek nya Kaban Parlimen Betong, Dr Richard Rapu,
Bukti iya ku Syed nerang diatu produk lada ari menua Betong diatu udah dijual ke Amerika Syarikat, Jipun, Jeddah, Arab Saudi enggau China.
“Naka tu kitai udah mujur ngerembaika produk-produk tu ngagai US ditangkan ke Jipun sereta bisi udah masuk ngagai supermakit di Jipun.
“Pia mega ba US, kitai udah bisi ba Amazon Online enggau ke bukai baka ba Wholemart di US.
“Nyadi dua agi makit ke deka dipasuk udah tu iya nya Arab Saudi di Jeddah.
“Kitai udah bisi di kedai. Produk-produk kitai enggau siti agi ba China kitai mega udah masuk nyadi chukup betuah laban nerima sukung ari (Kaban Parlimen Betong) YB Dr Richard,” ku iya.
Ku tandu Syed semua tu ketegal penyiru USM ti deka meda lalu ba jam ke sama deka ngangkatka genap produk di menua pesisir nengah inovasyen ke dikemisi sida.
Berebak enggau nya, lebuh ditanya bekaul enggau projek produk bukai ke bisi dipejalaika USM begulai enggau TERAJU, Syed Yusof madah ke jam diatu sida udah bejalai ke 10 iti projek di Betong lalu ba selampur Sarawak bisi enam iti.
Nangkan ke nya, Tuai Rumah Kelimbang Jaman ari Penyuluk, Ulu Layar ditu madah diri chukup gaga sereta chukup betuah laban rumah panjai sida dipilih endur bejalaika Projek Ngaga Palan Penyembui Lada Burak Solar.
Ku iya, enggau penembu palan nya ila deka ngemuntang ke agi pengawa sida serumah maya ngintu lada burak laban udah ngena chara moden.
“Aku ngarika kami serumah 32 pintu di Penyuluk ditu berasai gaga laban kami di Penyuluk ditu semua majoriti endang bekebun lada lalu kami udah diberi peluang ngemansangka pengawa ngintu lada ngena chara ke baru tauka moden,” ku iya.
Berebak enggau nya, iya ngarapka projek nya terus mujur dikena meri peransang ngagai sida serumah terus ngemansangka pengawa bekebun lada.
“Kami udah tu deka bebendar agi nguji ngangkatka asil kualiti lada di rumah panjai seraya ngangkatka nama nengeri Sarawak ngagai tikas ke lebih tinggi,” ku terang iya nyemetak.-TVS
